മഞ്ചേശ്വരത്തെ സദാചാര ആക്രമണം; ഒളിവില്‍പോയ കൂട്ടുപ്രതിക്കായി അന്വേഷണം ഊര്‍ജിതം

കാസര്‍ഗോഡ് മഞ്ചേശ്വരത്തെ സദാചാര ആക്രമണത്തില്‍ ഒളിവില്‍പോയ കൂട്ടുപ്രതിക്കായി അന്വേഷണം ഊര്‍ജിതമാക്കി പൊലീസ്. മഞ്ചേശ്വരം സ്വദേശി കൗഷിക് മംഗളൂരുവിലെക്ക് കടന്നുവെന്നാണ് പൊലീസിന്റെ നിഗമനം. അതേസമയം, കേസില്‍ നിലവില്‍ അറസ്റ്റ് ചെയ്ത രണ്ട് പ്രതികളെയും കോടതി റിമാന്റ് ചെയ്തു. കേസില്‍ ഒളിവില്‍പോയ പ്രതിക്കായി ഊര്‍ജിതമായ അന്വേഷണമാണ് പൊലീസ് നടത്തുന്നത്. സംഭവത്തിന് ശേഷം മഞ്ചേശ്വരം സ്വദേശിയായ കൗഷിക് അതിര്‍ത്തി കടന്ന് മംഗളൂരുവിലേക്ക് കടന്നുവെന്നാണ് പൊലീസിന്റെ നിഗമനം. ലഹരിക്കടിമകളായ പ്രതികള്‍ പ്രദേശത്ത് നിരന്തര തലവേദനയായിരുന്നുവെന്ന് പൊലീസ് തന്നെ വ്യക്തമാക്കുന്നു. സദാചാര ആക്രമണം, ലഹരിക്കടത്ത് ഉള്‍പ്പടെ വിവിധ സ്റ്റേഷനുകളിലായി പ്രതികള്‍ക്കെതിരെ നിരവധി കേസുകളാണ് നിലവിലുള്ളത്. സമീപത്തെ മറ്റൊരു കോളജിലെ വിദ്യാര്‍ത്ഥികളെ ആക്രമിച്ച കേസില്‍ നിലവില്‍ അറസ്റ്റിലായ രണ്ട് പ്രതികളും ജയില്‍ ശിക്ഷ അനുഭവിച്ചിരുന്നു. ഇവര്‍ മേഖലയില്‍ ലഹരിമരുന്നുകള്‍ എത്തിച്ചു നല്‍കുന്ന സംഘത്തിലെ പ്രധാന കണ്ണികളാണെന്നാണ് പൊലീസിന്റെ കണ്ടെത്തല്‍. കോടതിയില്‍ ഹാജരാക്കിയ പ്രതികളെ റിമാന്റ് ചെയ്തു. ക്യാമ്പസിന് സമീപം സാമൂഹ്യ വിരുദ്ധരുടെ ശല്യം വര്‍ധിച്ചുവരുന്ന പശ്ചാത്തലത്തില്‍ നിരീക്ഷണം ശക്തമാക്കാനാണ് പൊലീസിന്റെ തീരുമാനം.