ബില്ലിലെ തിരിമറി ബാറുടമ കണ്ടെത്തിയതില്‍ വൈരാഗ്യം; ബൈജു വധത്തില്‍ 7 പേര്‍ അറസ്റ്റില്‍

തൃശൂര്‍ തളിക്കുളം ബാറിലുണ്ടായ കത്തിക്കുത്തില്‍ ഒരാള്‍ കൊല്ലപ്പെട്ട സംഭവത്തില്‍ ഏഴു പേര്‍ അറസ്റ്റില്‍. കാട്ടൂര്‍ സ്വദേശികളായ അജ്മല്‍ (23 ), അതുല്‍, യാസിം, അമിത്, ധനേഷ്, വിഷ്ണു, അമല്‍ എന്നിവരാണ് പിടിയിലായത്. ഇവര്‍ സഞ്ചരിച്ച കാറും കണ്ടെടുത്തു. ഇന്നലെ രാത്രിയിലാണ് ബാറിലുണ്ടായ ആക്രമണത്തില്‍ തളിക്കുളം സ്വദേശി ബൈജു (35) കൊല്ലപ്പെട്ടത്. ബാറുടമ കൃഷ്ണരാജിന് ഗുരുതരമായി പരുക്കേറ്റു. ബൈജുവിന്റെ സുഹൃത്ത് അനന്തുവിനും കുത്തേറ്റു. കഞ്ചാവ്, ക്രിമിനല്‍ സംഘത്തിലെ അംഗങ്ങളാണ് പിടിയിലായത്. ഇവരെ ബാര്‍ ജീവനക്കാരന്‍ വിളിച്ചു വരുത്തിയതാണെന്നാണ് വിവരം. ബില്ലിലെ തിരിമറി ബാറുടമ കണ്ടുപിടച്ചതിന്റെ വൈരാഗ്യമാണ് കൊലയ്ക്കു കാരണമെന്ന് കരുതുന്നു. കൊല്ലപ്പെട്ട ബൈജു ബാറുടമയുടെ സഹായിയാണ്.