ദിലീപിനെ രക്ഷിക്കാനുള്ള ഗൂഢാലോചനയുടെ ബാക്കിപത്രമാണിത്- ബാലചന്ദ്രകുമാര്‍

ദിലീപിനെ വെള്ളപൂശാനുള്ള ശ്രമമാണ് ശ്രീലേഖ ഐ.പി.എസ് നടത്തുന്നതെന്ന് സംവിധായകന്‍ ബാലചന്ദ്രകുമാര്‍. മാധ്യമങ്ങളെ തൃപ്തിപ്പെടുത്താല്‍ പോലീസ് ഇതുപോലെ പ്രബലനായ ഒരു വ്യക്തിയെ കേസില്‍ കുടുക്കുമെന്ന് താന്‍ വിശ്വസിക്കുന്നില്ലെന്നും ബാലചന്ദ്രകുമാര്‍ പറഞ്ഞു. ദിലീപിനെതിരേ തെളിവില്ലെന്നും പോലീസ് കുടുക്കിയതാണെന്നും കെട്ടിച്ചമച്ച തെളിവുകളാണെന്നുമായിരുന്നു ശ്രീലേഖയുടെ ആരോപണം. കേസിലെ പ്രധാന സാക്ഷികളിലൊരാള്‍ ബാലചന്ദ്രകുമാറാണ്. പള്‍സര്‍ സുനിയെ ദിലീപിന്റെ വീട്ടില്‍വച്ചു കണ്ടിട്ടുണ്ടെന്നും നടിയെ ആക്രമിച്ച ദൃശ്യങ്ങള്‍ ദിലീപ് സ്വന്തം വീട്ടില്‍വച്ച് കണ്ടെന്നും ബാലചന്ദ്രകുമാര്‍ വെളിപ്പെടുത്തിയിരുന്നു. 'ദിലീപിന്റെ കേസില്‍ ഇവര്‍ അന്വേഷണത്തിന്റെ ഭാഗമായിട്ടില്ല എന്നാണ് ഞാന്‍ മനസ്സിലാക്കിയത്. ചിത്രം ഫോട്ടോഷോപ്പ് ചെയ്തതാണെന്ന് ഇവര്‍ പറയുന്നു. അതൊരിക്കലും ദിലീപ് പോലും ആരോപിച്ചിട്ടില്ല. ഈ തിരക്കഥയുടെ ലീഡ് അവര്‍ മറ്റൊരു മാധ്യമത്തില്‍ പറഞ്ഞിരുന്നു. ജയിലിലെ ദിലീപിന്റെ കഷ്ടപ്പാടുകളെക്കുറിച്ചും മറ്റും. അവരുടെ വെളിപ്പെടുത്തല്‍ ഈ കേസിനെ എങ്ങനെ ബാധിക്കുമെന്ന് എനിക്കറിയില്ല. 'ഞാന്‍ പള്‍സര്‍ സുനിയെ കാണുന്നത് മറ്റൊരുസ്ഥലത്ത് വച്ചാണ്. അതിന്റെ രേഖകള്‍ പോലീസിന്റെ പക്കലുണ്ട്. മാധ്യമങ്ങളെ തൃപ്തിപ്പെടുത്താല്‍ പോലീസ് ഇതുപോലെ പ്രബലനായ ഒരു വ്യക്തിയെ കേസില്‍ കുടുക്കുമെന്ന് ഞാന്‍ വിശ്വസിക്കുന്നില്ല. ദിലീപിനെ രക്ഷിക്കാന്‍ വേണ്ടി നടത്തുന്ന ഗൂഢാലോചനയുടെ ബാക്കിപത്രമാണിത്.'- ബാലചന്ദ്രകുമാര്‍ പറഞ്ഞു.