വിദേശയാത്രയുടെ വിവരം ഭാര്യയില്‍ നിന്ന് മറച്ചുവയ്ക്കാന്‍ പാസ്പോര്‍ട്ടിലെ പേജുകള്‍ കീറിക്കളഞ്ഞ യുവാവ് അറസ്റ്റില്‍

വിദേശയാത്രയുടെ വിവരം ഭാര്യയില്‍ നിന്നും മറച്ചുവയ്ക്കാന്‍ പാസ്പോര്‍ട്ടിലെ പേജുകള്‍ കീറിക്കളഞ്ഞ യുവാവ് അറസ്റ്റില്‍. പാസ്പോര്‍ട്ടില്‍ കൃത്രിമം കാട്ടിയെന്ന കുറ്റത്തിനാണ് യുവാവിനെ മുംബൈ പൊലീസ് പിടികൂടിയത്. ഏറെ നാളായി സൗഹൃദത്തിലായിരുന്ന പെണ്‍ സുഹൃത്തിനെ കാണാനായി 2019 ല്‍ നടത്തിയ വിദേശയാത്രയിലാണ് സംദര്‍ശി യാദവ് ഇപ്പോള്‍ വെട്ടിലായത്. വിവാഹത്തിന് മുമ്പായിരുന്നു സംദര്‍ശിയുടെ തായ്‌ലാന്‍ഡ് സന്ദര്‍ശനം. സൗഹൃദം ഭാര്യയില്‍ നിന്ന് മറച്ചുവെക്കാനായിരുന്നു പാസ്പോര്‍ട്ടിലെ യാത്ര വിവരങ്ങള്‍ കീറി കളഞ്ഞത്. കഴിഞ്ഞ ദിവസം മാലദ്വീപിലേക്ക് പോകാനായി മുംബൈ വിമാനത്താവളത്തില്‍ എത്തിയതോടെ പാസ്പോര്‍ട്ടിലെ ചില പേജുകള്‍ കീറിയിരിക്കുന്നത് ഇമിഗ്രേഷന്‍ വിഭാഗത്തിന്റെ ശ്രദ്ധയില്‍പ്പെട്ടു. പിന്നാലെ പൊലീസ് നടത്തിയ ചോദ്യം ചെയ്യലിലാണ് ഭാര്യയില്‍ നിന്ന് മറച്ചുവെച്ച വിദേശയാത്ര പുറത്തറിയുന്നത്. സംദര്‍ശി കുറ്റം സമ്മതിച്ചതോടെ അറസ്റ്റ് രേഖപ്പെടുത്തി. വഞ്ചനയ്ക്കും കള്ളയാധാരമുണ്ടാക്കിയതിനും ഐപിസി ചട്ടങ്ങള്‍ അനുസരിച്ച് കേസെടുത്ത സംദര്‍ശിയെ പിന്നീട് അന്ധേരി മെട്രോപ്പൊലിറ്റന്‍ മജിസ്ട്രേറ്റ് കോടതി ജാമ്യം നല്‍കി. ജാമ്യ തുകയായി 25,000 രൂപ കെട്ടിവെച്ചു. പാസ്പോര്‍ട്ടില്‍ കൃത്രിമത്വം വരുത്തുന്നത് കുറ്റകരമാണെന്ന് അറിയാതെയായിരുന്നു യുവാവിന്റെ നടപടി എന്ന് പൊലീസ് വ്യക്തമാക്കി.