‘കിടക്ക പങ്കിടാന്‍ പറഞ്ഞു, സ്വകാര്യ ഭാഗങ്ങളില്‍ സ്പര്‍ശിച്ചു’: പരാതി പൊലീസിന് കൈമാറാതെ യൂത്ത് കോണ്‍ഗ്രസ് നേതൃത്വം

പാലക്കാട്: ചിന്തന്‍ ശിബിരത്തില്‍ വെച്ച് സംസ്ഥാന നേതാവ് തന്നോട് അപമര്യാദയായി പെരുമാറിയെന്ന യൂത്ത് കോണ്‍ഗ്രസ് വനിതാ നേതാവിന്റെ പരാതി സംസ്ഥാന നേതൃത്വം പൊലീസിന് കൈമാറുന്നില്ല. മദ്യപിച്ചെത്തി കിടക്ക പങ്കിടാന്‍ ആവശ്യപ്പെട്ടെന്നും സ്വകാര്യ ഭാഗങ്ങളില്‍ സ്പര്‍ശിച്ചെന്നും പരാതിയില്‍ പറയുന്നുണ്ട്. എന്നാല്‍ പരാതിക്കാരിയായ പെണ്‍കുട്ടി പ്രശ്‌നം സംഘടന പരിഹരിക്കുമെന്നാണ് പറയുന്നത്. പരാതി പൊലീസിന് കൈമാറാന്‍ സംഘടനയുടെ സംസ്ഥാന അധ്യക്ഷനായ ഷാഫി പറമ്പില്‍ എംഎല്‍എ പോലും തയ്യാറാകുന്നില്ല. പാലക്കാട് സിപിഎം നേതാവും എംഎല്‍എയുമായിരുന്ന ശശിക്കെതിരെ പീഡന പരാതി ഉയര്‍ന്ന ഘട്ടത്തില്‍, ഇത് പൊലീസിന് കൈമാറാതിരുന്നതിനെ ഷാഫി പറമ്പില്‍ ചോദ്യം ചെയ്തിരുന്നു. ഇതേ ഷാഫി പറമ്പില്‍ സംസ്ഥാന അധ്യക്ഷനായ യൂത്ത് കോണ്‍ഗ്രസിന്റെ ചിന്തന്‍ ശിബിരത്തില്‍ വെച്ചാണ് വനിതാ നേതാവ് സഹപ്രവര്‍ത്തകനെതിരെ ഗുരുതരമായ കുറ്റങ്ങള്‍ ആരോപിച്ച് പരാതി നല്‍കിയത്. യൂത്ത് കോണ്‍ഗ്രസിന്റെ പരിശീലന ക്യാമ്പായിരുന്നു ഇത്. ജില്ലാ നേതാവായ യുവതിയോട് സംസ്ഥാന നിര്‍വാഹക സമിതി അംഗമായ വിവേക് ആര്‍ നായര്‍ മദ്യപിച്ചെത്തി അപമര്യാദയായി പെരുമാറുകയായിരുന്നു. ആവര്‍ത്തിച്ച് മോശമായി പെരുമാറിയെന്ന് ആരോപിച്ചാണ് വിവേക് ആര്‍ നായര്‍ക്കെതിരെ യൂത്ത് കോണ്‍ഗ്രസ് നേതൃത്വം നടപടിയെടുത്തത്. അതിനര്‍ത്ഥം വിവേക് ആര്‍ നായര്‍ മുന്‍പും സമാനമായ കുറ്റം ചെയ്തുവെന്നാണ്. എന്നാല്‍ ഷാഫി പറമ്പില്‍ അടക്കമുള്ളവര്‍ യുവതിയുടെ പരാതി പൊലീസിന് കൈമാറിയില്ല. എംസി ജോസഫൈന്‍ പാര്‍ട്ടി കോടതി പരാമര്‍ശം നടത്തിയപ്പോഴും യൂത്ത് കോണ്‍ഗ്രസ് നേതാക്കള്‍ വലിയ തോതില്‍ അതിനെ കളിയാക്കുകയും വിമര്‍ശിച്ച് രംഗത്ത് വരികയും ചെയ്തിരുന്നു. സംഭവത്തില്‍ പെണ്‍കുട്ടിയും പ്രതികരിക്കാന്‍ തയ്യാറല്ല. വിഷയത്തില്‍ പാര്‍ട്ടിയും സംഘടനയും തീരുമാനമെടുക്കുമെന്നും തനിക്കൊന്നും പറയാനില്ലെന്നുമാണ് പ്രതികരണം തേടിയപ്പോള്‍ പെണ്‍കുട്ടി നല്‍കിയ മറുപടി. യൂത്ത് കോണ്‍ഗ്രസിനാകെ നാണക്കേടായി മാറിയ സംഭവം നിയമ നടപടികള്‍ക്കായി കൈമാറേണ്ടതാണ്. പരാതിയില്‍ ഇത്തരത്തിലുള്ള ഗുരുതരമായ കുറ്റങ്ങളാണ് ആരോപിക്കുന്നത്. മദ്യപിച്ചെത്തി കിടക്ക പങ്കിടാന്‍ ആവശ്യപ്പെട്ടെന്നും സ്വകാര്യ ഭാഗങ്ങളില്‍ സ്പര്‍ശിച്ചുവെന്നും പരാതിയില്‍ വ്യക്തമാക്കുന്നുണ്ട്. പരാതിയുടെ പകര്‍പ്പ് പ്രചരിക്കുന്നുണ്ടെങ്കിലും ഇത് തന്നെയാണോ പരാതിയെന്ന് ഔദ്യോഗിക സ്ഥിരീകരണം ഉണ്ടായിട്ടില്ല. എന്നാല്‍ ചിന്തന്‍ ശിബിരത്തിനകത്ത് നടന്ന കാര്യങ്ങള്‍ ഇതിനകത്ത് പറയുന്നുമുണ്ട്. വിവേക് ശിബിരത്തിനിടെ സംസ്ഥാന വൈസ് പ്രസിഡന്റുമാരിലൊരാളോടും മോശമായി പെരുമാറിയിരുന്നു. രണ്ട് പ്രശ്‌നവും കണക്കിലെടുത്താണ് സംസ്ഥാന നേതൃത്വത്തിന്റെ ശുപാര്‍ശ അനുസരിച്ച് ദേശീയ സെക്രട്ടറിയാണ് വിവേകിനെ സംഘടനയുടെ പ്രാഥമിക അംഗത്വത്തില്‍ നിന്നും പുറത്താക്കിയത്.