മട്ടന്നൂര്‍ സ്‌ഫോടനം; വിശദമായ അന്വേഷണം ആവശ്യമെന്ന് പൊലീസ്

കണ്ണൂര്‍ മട്ടന്നൂരില്‍ ആക്രി സാധനങ്ങള്‍ സൂക്ഷിച്ചിരുന്ന കെട്ടിടത്തിലുണ്ടായിരുന്ന സ്ഫോടനവുമായി ബന്ധപ്പെട്ട ദുരൂഹത നീക്കാന്‍ വിശദമായ അന്വേഷണം ആവശ്യമെന്ന് പൊലീസ്. ബോംബുകളുടെ ഉറവിടം സംബന്ധിച്ച് അന്വേഷണം ആവശ്യമാണെന്നാണ് പൊലീസിന്റെ പൊതുവെയുള്ള വിലയിരുത്തല്‍. സംഭവത്തില്‍ കൂടുതല്‍ ആളുകളെ ഉടന്‍ ചോദ്യം ചെയ്യും. അസം സ്വദേശികളായ ഫസല്‍ ഹഖ് മകന്‍ സെയ്ദുല്‍ ഹഖ് എന്നിവരാണ് ഇന്നലെയുണ്ടായ സ്‌ഫോടനത്തില്‍ മരിച്ചത്. ആക്രി പെറുക്കുന്നതിനിടെ കിട്ടിയ സ്റ്റീല്‍ പാത്രം വീട്ടില്‍ കൊണ്ടുപോയി തുറന്നപ്പോഴായിരുന്നു പൊട്ടിത്തെറി. ഒന്നില്‍ കൂടുതല്‍ ബോംബുകള്‍ പൊട്ടിത്തെറിച്ചു എന്ന് പൊലീസിനു സംശയമുണ്ട്. സമീപ ദിവസങ്ങളില്‍ കണ്ണൂര്‍ ജില്ലയുടെ വിവിധ പ്രദേശങ്ങളില്‍ നിന്ന് ഉപേക്ഷിക്കപ്പെട്ട സ്റ്റീല്‍ ബോംബുകള്‍ കണ്ടെത്തിയിരുന്നു. ഇങ്ങനെ ഉപേക്ഷിക്കപ്പെട്ട സ്റ്റീല്‍ ബോംബുകളാവാം ഇവര്‍ ശേഖരിച്ചതെന്നും പൊലീസ് കരുതുന്നു. ഫൊറന്‍സിക് റിപ്പോര്‍ട്ട് ലഭിക്കാനുണ്ട്. ഉഗ്ര ശബ്ദത്തില്‍ പൊട്ടിത്തെറി അയല്‍ക്കാരാണ് ആദ്യം കണ്ടത്. പൊലീസും എത്തി പരിശോധിച്ചപ്പോള്‍ ഒരാള്‍ കൊല്ലപ്പെട്ടതായും ഒരാള്‍ക്ക് ഗുരുതരമായി പരിക്കേറ്റതായും കണ്ടെത്തി. ഫസല്‍ ഹഖ് (50) ആണ് സ്‌ഫോടനസ്ഥലത്ത് വച്ച് മരിച്ചത്. ഗുരുതരമായി പരിക്കേറ്റ മകന്‍ സെയ്ദുല്‍ ഹഖ് 22 ആശുപത്രിയില്‍ വച്ചും മരിച്ചു. പൊലീസ് ഫൊറന്‍സിക് സംഘം നടത്തിയ പരിശോധനയില്‍ സ്റ്റീല്‍ ബോംബാണ് പൊട്ടിത്തെറിച്ചതെന്ന് വ്യക്തമായി. പ്ലാസ്റ്റിക് കുപ്പികളും പാത്രങ്ങളുമൊക്കെ വീടുകളില്‍ പോയി ശേഖരിച്ച് കൊണ്ടുവന്ന് കച്ചവടം നടത്തിയാണ് ഇവരുടെ ഉപജീവനം. വ്യത്യസ്ഥ സ്ഥലങ്ങളില്‍ പോയാണ് ആക്രി ശേഖരിക്കുന്നത്.