അമരാവതിയിലേത് ഐഎസ് മോഡല്‍ വധം, പ്രതിഫലം 10,000 രൂപ’; സൂത്രധാരന്‍ പിടിയില്‍

മഹാരാഷ്ട്രയിലെ അമരാവതിയില്‍ ജൂണ്‍ 21നു മരുന്നുകട ഉടമ കൊല്ലപ്പെട്ട കേസില്‍ എന്‍ഐഎ അന്വേഷണം തുടങ്ങി. യുഎപിഎ ചുമത്തിയാണ് കേസെടുത്തിരിക്കുന്നത്. കൊലക്കുറ്റം, ഗൂഢാലോചന, വിദ്വേഷം വളര്‍ത്തല്‍ തുടങ്ങിയ കുറ്റങ്ങളും പ്രതികള്‍ക്കെതിരെ ചുമത്തി. ഐഎസ് മോഡല്‍ കൊലപാതകമാണ് അമരാവതിയില്‍ നടന്നതെന്നും ദേശസുരക്ഷയെ ബാധിക്കുന്ന ഭീകരപ്രവര്‍ത്തനമാണെന്നും എഫ്‌ഐആറില്‍ പരാമര്‍ശമുണ്ട്. ബിജെപി വക്താവായിരുന്ന നൂപുര്‍ ശര്‍മയുടെ പ്രവാചക വിരുദ്ധ പരാമര്‍ശങ്ങളെ പിന്തുണയ്ക്കുന്ന ചില പോസ്റ്റുകള്‍ കൊല്ലപ്പെട്ട ഉമേഷ് പ്രഹ്ലാദ്റാവു കോല്‍ഹെ (54) വാട്‌സാപ്പില്‍ പങ്കുവച്ചിരുന്നതായി മഹാരാഷ്ട്ര പൊലീസ് കണ്ടെത്തിയിരുന്നു. സംഭവത്തില്‍ മുഖ്യപ്രതി ഇര്‍ഫാന്‍ ഖാന്‍ (32) അടക്കമുള്ള പ്രതികള്‍ പിടിയിലായതായി പൊലീസ് അറിയിച്ചു. ശനിയാഴ്ച രാത്രിയോടെയാണ് ഇയാള്‍ പിടിയിലായത്. അമരാവതിയിലെ ബിജെപി നേതൃത്വമാണ് ഉമേഷിന്റെ മരണത്തില്‍ സംശയവും പരാതിയുമായി രംഗത്തെത്തിയത്. തുടര്‍ന്നു കേന്ദ്ര ആഭ്യന്തര മന്ത്രി അമിത് ഷായുടെ ഇടപെടലിനെ തുടര്‍ന്ന് എന്‍ഐഎ അന്വേഷണം പ്രഖ്യാപിക്കുകയായിരുന്നു. സംഭവത്തില്‍ മുദ്ദ്സിര്‍ അഹമ്മദ് (22), ഷാറുഖ് പഠാന്‍ (25), അബ്ദുല്‍ തൗഫീഖ് (24) ഷുഐബ് ഖാന്‍ (22), അതീബ് റാഷിദ് (22) എന്നിവര്‍ നേരത്തേതന്നെ അറസ്റ്റിലായിയിരുന്നു. ഇവരെ നിയോഗിച്ചത് ഇര്‍ഫാന്‍ ഖാന്‍ ആണെന്ന് അമരാവതി പൊലീസ് കമ്മിഷണര്‍ ഡോ. ആരതി സിങ് പറഞ്ഞു. ഇയാള്‍ എന്‍ജിഒ നടത്തുകയാണെന്നും 10,000 രൂപയാണു കൊലയാളികള്‍ക്കു വാഗ്ദാനം ചെയ്ത പ്രതിഫലമെന്നും പൊലീസ് അറിയിച്ചു. ഉമേഷ് കടയടച്ച് ഇരുചക്ര വാഹനത്തില്‍ വീട്ടിലേക്കു പോകുമ്പോള്‍ രാത്രി പത്തിനും 10.30നും ഇടയ്ക്കാണു കൊല്ലപ്പെട്ടത്. 2 ബൈക്കുകളില്‍ പിന്തുടര്‍ന്നവര്‍ ഇടയ്ക്കുവച്ചു തടഞ്ഞുനിര്‍ത്തി ആക്രമിക്കുകയായിരുന്നു. കൊലപാതകത്തിന് ഉപയോഗിച്ച കത്തി കണ്ടെടുത്തു. സിസിടിവി ദൃശ്യങ്ങളും ശേഖരിച്ചു. രാജസ്ഥാനിലെ ഉദയ്പുരില്‍ കനയ്യലാല്‍ കൊല്ലപ്പെട്ട കേസും എന്‍ഐഎയാണ് അന്വേഷിക്കുന്നത്.