കാസര്‍കോട്ടെ പ്രവാസിയുടെ കൊലപാതകം; 2 മുഖ്യ പ്രതികള്‍ അറസ്റ്റില്‍

കാസര്‍കോട്: കുമ്പള മുഗു സ്വദേശിയും പ്രവാസിയുമായ അബൂബക്കര്‍ സിദ്ദിഖിന്റെ കൊലപാതകത്തില്‍ നേരിട്ട് ബന്ധമുള്ള രണ്ടുപേര്‍ അറസ്റ്റില്‍. മഞ്ചേശ്വരം ഉദ്യാവര്‍ സ്വദേശികളായ അബ്ദുള്‍ റഹിം ( 41), അബ്ദുള്‍ അസീസ് (36) എന്നിവരാണ് പിടിയിലായത്. റഹിം ക്വട്ടേഷന്‍ സംഘത്തില്‍ ഉള്ള ആളാണെന്നും അസീസ് ഗൂഢാലോചനയില്‍ പങ്കെടുത്ത ആളാണെന്നുമാണ് പോലീസ് പറയുന്നത്. പ്രതികളിലൊരാള്‍ ഗള്‍ഫിലെത്തിയെന്നാണ് പോലീസ് നല്‍കുന്ന വിവരം. സംഭവത്തില്‍ ഇപ്പോള്‍ മൂന്നുപേര്‍ കൂടി കസ്റ്റഡിയിലുണ്ട്. കൂടുതല്‍ പേരുടെ അറസ്റ്റ് ഉടനുണ്ടാകുമെന്ന് ജില്ല പോലീസ് മേധാവി വൈഭവ് സക്സേന പറഞ്ഞു. ഞായറാഴ്ച വൈകീട്ടാണ് അബൂബക്കര്‍ സിദ്ദിഖിനെ നാട്ടിലേക്ക് വിളിച്ചുവരുത്തി തട്ടിക്കൊണ്ടുപോയി കൊലപ്പെടുത്തിയത്. ക്രൂരമായ അക്രമത്തില്‍ കൊലപ്പെടുത്തുകയായിരുന്നു. മരിച്ചെന്ന് ഉറപ്പാക്കി ക്വട്ടേഷന്‍ ഏര്‍പ്പെടുത്തിയ യുവാക്കള്‍ക്ക് മൃതദേഹം വിട്ടുകൊടുത്ത ശേഷം സന്ധ്യയോടെ ബന്തിയോട്ടെ ആശുപത്രിയിലെത്തിച്ചിരുന്നു. കാഷ്വാലിറ്റിയില്‍ വച്ച് മരണം ഉറപ്പാക്കിയതോടെ വാഹനത്തിലെത്തിയ പ്രതികള്‍ മുങ്ങിയിരുന്നു. വിദേശത്തേക്ക് ഡോളര്‍ കടത്തിയതുമായി ബന്ധപ്പെട്ട തര്‍ക്കമാണ് കൊലപാതകത്തിലേക്ക് നയിച്ചതെന്നാണ് അന്വേഷണസംഘത്തിന്റെ കണ്ടെത്തല്‍. മരിച്ച സിദ്ദിഖിന്റെ സഹോദരന്‍ അന്‍വറിനെയും സുഹൃത്ത് അന്‍സാരിയെയും ഒരു സംഘം നേരത്തെ തട്ടിക്കൊണ്ടുപോയിരുന്നു. ഇവരെ ബന്ദിയാക്കിയാണ് ദുബായില്‍ നിന്ന് സിദ്ദിഖിനെ നാട്ടിലേക്ക് വിളിച്ചുവരുത്തിയത്. മംഗളൂരുവില്‍ വിമാനമിറങ്ങിയ സിദ്ദിഖ് നേരെ പൈവളികെയില്‍ സംഘത്തിന്റെ കേന്ദ്രത്തിലേക്ക് കൂട്ടികൊണ്ടു പോവുകയായിരുന്നു. തുടര്‍ന്നുണ്ടായ മര്‍ദനത്തിലാണ് സിദ്ദിഖ് കൊല്ലപ്പെടുന്നത്. തലച്ചോറിനേറ്റ ക്ഷതമെന്നാണ് മരണകാരണമായി പോസ്റ്റ്മോര്‍ട്ടം റിപ്പോര്‍ട്ടില്‍ പറയുന്നത്. പേശികള്‍ അടിയേറ്റ് ചതഞ്ഞ നിലയിലാണെന്നും പോസ്റ്റ്മോര്‍ട്ടം റിപ്പോര്‍ട്ടിലുണ്ട്.