കോട്ടയത്ത് മാര്‍ച്ചിനിടെ സംഘര്‍ഷം; 100 കോണ്‍ഗ്രസ് പ്രവര്‍ത്തകര്‍ക്കെതിരെ കേസ്

കോണ്‍ഗ്രസ്, യൂത്ത് കോണ്‍ഗ്രസ് നേതാക്കളെ സിപിഎം പ്രവര്‍ത്തകര്‍ മര്‍ദിച്ചതില്‍ പ്രതിഷേധിച്ച് യുഡിഎഫ് പ്രവര്‍ത്തകര്‍ നടത്തിയ കലക്ടേറേറ്റ് മാര്‍ച്ചിനിടെ നടന്ന സംഘര്‍ഷത്തില്‍ കണ്ടാലറിയാവുന്ന 100 കോണ്‍ഗ്രസ് പ്രവര്‍ത്തകര്‍ക്കെതിരെ കേസെടുത്തതായി പൊലീസ്. അഞ്ചുപേരെ അറസ്റ്റ് ചെയ്തു. പൊതുമുതല്‍ നശിപ്പിച്ചതിന് ഉള്‍പ്പെടെയാണ് കേസ്. യുഡിഎഫ് പ്രവര്‍ത്തകര്‍ നടത്തിയ കലക്ടറേറ്റ് മാര്‍ച്ച് നഗരത്തില്‍ ഒന്നര മണിക്കൂര്‍ സംഘര്‍ഷാവസ്ഥ സൃഷ്ടിച്ചിരുന്നു. പ്രവര്‍ത്തകരെ പിരിച്ചുവിടാന്‍ പൊലീസ് ജലപീരങ്കിയും കണ്ണീര്‍ വാതകവും ലാത്തിച്ചാര്‍ജും നടത്തി. ലാത്തിച്ചാര്‍ജില്‍ 15 പ്രവര്‍ത്തകര്‍ക്കു പരുക്കേറ്റു. ബാരിക്കേഡ് തലയില്‍ ഇടിച്ച് ഡിവൈഎസ്പി ജെ.സന്തോഷ് കുമാറിനു പരുക്കേറ്റു. കഴിഞ്ഞ ദിവസം വൈകിട്ട് പ്രകടനം നടത്തിയ കോണ്‍ഗ്രസ് പ്രവര്‍ത്തകരും സിപിഎം പ്രവര്‍ത്തകരുമായി സംഘര്‍ഷമുണ്ടായിരുന്നു. ഈ സംഭവത്തില്‍ പ്രതിഷേധിച്ച് യുഡിഎഫ് ജില്ലാ കമ്മിറ്റി ആഹ്വാനം ചെയ്ത മാര്‍ച്ച് ഗാന്ധി സ്‌ക്വയറില്‍ നിന്ന് ശനിയാഴ്ച വൈകുന്നേരം അഞ്ച് മണിക്കാണ് ആരംഭിച്ചത്. പിന്നാലെ ഐഎന്‍ടിയുസി പ്രവര്‍ത്തകരും മാര്‍ച്ച് നടത്തി. കലക്ടറേറ്റില്‍ വന്‍ പൊലീസ് സന്നാഹമുണ്ടായിരുന്നു. കെകെ റോഡിലൂടെ മാര്‍ച്ച് കലക്ടറേറ്റിനു മുന്നിലെത്തിയ ശേഷം മുതിര്‍ന്ന നേതാക്കള്‍ മടങ്ങിയതോടെയാണ് സംഘര്‍ഷം ആരംഭിച്ചത്. സര്‍ക്കാരിനും സിപിഎമ്മിനും എതിരെ മുദ്രാവാക്യം മുഴക്കിയ പ്രവര്‍ത്തകര്‍ കലക്ടറേറ്റിനു മുന്നിലെ ബാരിക്കേഡ് തകര്‍ക്കാന്‍ ശ്രമിച്ചു. ഗേറ്റിനു മുകളിലൂടെ കലക്ടറേറ്റ് വളപ്പിലേക്ക് ചാടിക്കടക്കാന്‍ ശ്രമിച്ച പ്രവര്‍ത്തകരെ പൊലീസ് ലാത്തിവീശി പിന്തിരിപ്പിച്ചു. തുടര്‍ന്നു കല്ലേറുണ്ടായി. ഇതോടെ പൊലീസ് ജലപീരങ്കി പ്രയോഗിച്ചു. പ്രവര്‍ത്തകര്‍ ചിതറിയോടി. പ്രവര്‍ത്തകര്‍ ഉടന്‍ സംഘടിച്ച് കലക്ടറേറ്റിനു സമീപത്തെ ഈസ്റ്റ് പൊലീസ് സ്റ്റേഷനിലേക്ക് മാര്‍ച്ച് നടത്തി. എസ്പി ഓഫിസിലേക്കുള്ള പ്രവേശന കവാടവും സ്റ്റേഷനു മുന്‍വശവും പൊലീസ് ബാരിക്കേഡ് വച്ച് അടച്ചിരുന്നു.