നടിയെ ആക്രമിച്ച കേസ്: മെമ്മറി കാര്‍ഡ് കേന്ദ്ര ഫോറന്‍സിക് ലാബില്‍ പരിശോധിക്കാമെന്ന് പ്രോസിക്യൂഷന്‍

കൊച്ചി: നടിയെ ആക്രമിച്ച കേസിലെ മുഖ്യ തെളിവായ മെമ്മറി കാര്‍ഡ് കേന്ദ്ര ഫൊറന്‍സിക് ലാബില്‍ പരിശോധിക്കുന്നതിനു സമ്മതമാണെന്ന് പ്രോസിക്യൂഷന്‍ ഹൈക്കോടതിയില്‍. ഇക്കാര്യത്തില്‍ സര്‍ക്കാര്‍ നേരത്തെ സ്വീകരിച്ച നിലപാടിനു വിരുദ്ധമായ നിലപാടാണ് ഇന്നു സ്വീകരിച്ചത്. കേന്ദ്ര ഫൊറന്‍സിക് ലാബില്‍ കാര്‍ഡ് പരിശോധിക്കാമോ എന്ന കോടതിയുടെ ചോദ്യത്തിന് പറ്റില്ലെന്നും അതു സംസ്ഥാനത്തെ ലാബുകളുടെ വിശ്വാസ്യതയെ ബാധിക്കുമെന്നുമാണ് മുന്‍പ് സര്‍ക്കാര്‍ നിലപാടെടുത്തത്. ഇക്കാര്യത്തില്‍ വ്യക്തമായ മറുപടി നല്‍കാനായിരുന്നു കോടതിയുടെ നിര്‍ദേശം. മെമ്മറി കാര്‍ഡിലെ ഫയലുകള്‍ പരിശോധിക്കുന്നത് കാര്‍ഡിന്റെ ഹാഷ് വാല്യു മാറുന്നതിന് ഇടയാക്കുമെന്നു സംസ്ഥാന ഫൊറന്‍സിക് ലാബിലെ അസിസ്റ്റന്റ് ഡയറക്ടര്‍ കോടതിയെ അറിയിച്ചിട്ടുണ്ട്. കാര്‍ഡ് കേന്ദ്ര ഫൊറന്‍സിക് ലാബില്‍ പരിശോധിക്കുന്നതിനെ എന്തുകൊണ്ടാണ് നേരത്തെ എതിര്‍ത്തത് എന്ന് കോടതി ആരാഞ്ഞു. എന്നാല്‍, ഇപ്പോള്‍ ഇക്കാര്യത്തില്‍ എതിര്‍പ്പില്ലെന്ന് പ്രോസിക്യൂഷന്‍ കോടതിയെ അറിയിച്ചു. അതേസമയം, അന്വേഷണം നീട്ടിക്കൊണ്ടു പോകാനുള്ള ക്രൈംബ്രാഞ്ചിന്റെ പുതിയ അടവാണ് ഇതെന്നായിരുന്നു ദിലീപിന്റെ അഭിഭാഷകന്റെ വാദം. ഫൊറന്‍സിക് ലാബില്‍ പരിശോധനയ്ക്ക് അയച്ചാല്‍ ഫലം ലഭിക്കാന്‍ കൂടുതല്‍ സമയമെടുക്കുമെന്നും ചൂണ്ടിക്കാട്ടി. എന്നാല്‍, പരിശോധനയ്ക്ക് ഒരു സമയപരിധി നിശ്ചയിക്കാം എന്നായിരുന്നു കോടതിയുടെ മറുപടി. കേസിലുള്ള വാദം അടുത്ത ചൊവ്വാഴ്ച പരിഗണിക്കാന്‍ മാറ്റി.