ഷഹാനയുടെ സാമ്പത്തിക ഇടപാടുകളെക്കുറിച്ച് പോലിസ് അന്വേഷണം തുടങ്ങി

ആലപ്പുഴ: പോലീസ് ക്വാട്ടേഴ്സിലെ കൂട്ടമരണവുമായി ബന്ധപ്പെട്ട് പൊലീസുകാരനായ റെനീസിന്റെ കാമുകി ഷഹാനയുടെ സാമ്പത്തിക ഇടപാടുകളെക്കുറിച്ച് പോലിസ് അന്വേഷണം തുടങ്ങി. ഷഹാനയുടെ കാമുകനും സിവില്‍പോലിസ് ഓഫിസറുമായ റെനീസിനും പലിശയുമായി ബന്ധപ്പെട്ടുള്ള സാമ്പത്തിക ഇടപാടുകളുണ്ടായിരുന്നു. ഇത്തരത്തിലുള്ള ഷഹാനയുടെ ബന്ധങ്ങളെക്കുറിച്ചാണ് പോലിസ് അന്വേഷണം നടത്തുന്നത്. ഇരുവരുടേയും മൊബൈല്‍ഫോണ്‍ സന്ദേശങ്ങള്‍ ഉള്‍പ്പെടെയുള്ള ശാസ്ത്രീയ തെളിവുകള്‍ ഫൊറന്‍സിക് വിഭാഗത്തില്‍ നിന്നും ഉടന്‍ ലഭിക്കുമെന്ന് അന്വേഷണ സംഘത്തലവനായ ഡിസിആര്‍ബി ഡിവൈഎസ്പി കെ എല്‍ സജിമോന്‍ അറിയിച്ചു. രണ്ട് മക്കളെ കൊലപെടുത്തി അമ്മ ആത്മഹത്യ ചെയ്ത കേസില്‍ ആത്മഹത്യാ പ്രേരണ കുറ്റം ചുമത്തി ഷഹാനയെ ഇന്നലെ അറസ്റ്റു ചെയ്യുകയും ആലപ്പുഴ എ ആര്‍ ക്യാംപ് ക്വാര്‍ട്ടേഴ്‌സിലെത്തിച്ച് തെളിവെടുപ്പു നടത്തുകയും ചെയ്തിരുന്നു. റെനീസിനെ കല്യാണം കഴിക്കാന്‍ ഷഹാന സമ്മര്‍ദ്ദം ചെലുത്തി. നജ്ലയും മക്കളും ഒഴിയണം എന്നായിരുന്നു ആവശ്യം. അല്ലെങ്കില്‍ ഭാര്യയായി താമസിക്കാന്‍ നിര്‍ബന്ധിച്ചു. 6 മാസം മുമ്പ് ഫ്‌ളാറ്റില്‍ എത്തി നജ്ലയെ ഭീഷണിപ്പെടുത്തി. ആത്മഹത്യ ചെയ്ത ദിവസവും ഷഹാന ഫ്‌ളാറ്റിലെത്തി വഴക്കിട്ടുവെന്നാണ് പോലിസിന്റെ കണ്ടെത്തല്‍. കഴിഞ്ഞ മെയ് പത്തിനാണ് ആലപ്പുഴ കുന്നുംപുറത്തെ എആര്‍ ക്യാംപ് ക്വാര്‍ട്ടേഴ്‌സില്‍ താമസിക്കുന്ന കൊല്ലം കേരളപുരം സ്വദേശി നജ് ല (27) മക്കളായ ടിപ്പുസുല്‍ത്താന്‍ അഞ്ച്, മലാല ഒന്നരവയസ് എന്നിവരെ മരിച്ച നിലയില്‍ കണ്ടെത്തിയത്. മക്കളെ കൊലപ്പെടുത്തി ശേഷം നജ് ല തൂങ്ങി മരിക്കുകയായിരുന്നുവെന്നാണ് പോലിസ് കണ്ടെത്തിയത്. സംഭവവുമായി ബന്ധപ്പെട്ട് ഭര്‍ത്താവും സിവില്‍ പോലിസ് ഓഫിസറുമായ റെനീസ് റിമാന്‍ഡിലാണ്.