തമിഴ്‌നാട്ടില്‍ ക്ഷേത്രോത്സവത്തിനിടെ കൂറ്റന്‍ രഥം മറിഞ്ഞ് രണ്ട് പേര്‍ മരിച്ചു

ചെന്നൈ: തമിഴ്‌നാട്ടിലെ ധര്‍മ്മപുരിയില്‍ ക്ഷേത്രോത്സവത്തിനിടെ കൂറ്റന്‍ രഥം മറിഞ്ഞ് രണ്ട് പേര്‍ മരിച്ചു. നാല് പേര്‍ക്ക് അപകടത്തില്‍ പരിക്കേറ്റു. സി. മനോഹരന്‍ (57), ജി. ശരവണന്‍ (50) എന്നിവരാണ് മരിച്ചത്. പപ്പാരപ്പട്ടിയിലെ കാളിയമ്മന്‍ ക്ഷേത്രത്തിലെ വൈഖാശി ഉത്സവത്തിന്റെ ഭാഗമായി നടന്ന ചടങ്ങുകള്‍ക്കിടെയാണ് സംഭവം. അലങ്കരിച്ച രഥം ആരാധനാലയത്തിന് സമീപത്തെ പ്രധാന വീഥികളില്‍ പ്രദക്ഷിണം വയ്ക്കുന്നതിനിടെയാണ് അപകടം ഉണ്ടായത്. രഥം പെട്ടെന്ന് മറിഞ്ഞെന്നും ഇതിന്റെ ചക്രത്തിനടിയില്‍ കുടുങ്ങി രണ്ട് പേര്‍ മരിച്ചെന്നും മുതിര്‍ന്ന പൊലീസ് ഉദ്യോഗസ്ഥര്‍ പറഞ്ഞു. ഭക്തരും നാട്ടുകാരുമാണ് രഥത്തിനടിയില്‍ കുടുങ്ങിയവരെ രക്ഷപ്പെടുത്തിയത്. സംഭവത്തില്‍ തമിഴ്നാട് മുഖ്യമന്ത്രി എം.കെ. സ്റ്റാലിന്‍ അനുശോചനം രേഖപ്പെടുത്തി. മരിച്ചവരുടെ കുടുംബങ്ങള്‍ക്ക് അഞ്ച് ലക്ഷം രൂപ വീതവും പരിക്കേറ്റവര്‍ക്ക് 50000 രൂപയും ധനസഹായം പ്രഖ്യാപിച്ചു. അപകടത്തില്‍ നാല് പേര്‍ക്ക് പരിക്കേറ്റതായും ധര്‍മ്മപുരി സര്‍ക്കാര്‍ മെഡിക്കല്‍ കോളജ് ആശുപത്രിയില്‍ ഇവര്‍ ചികിത്സയിലാണെന്നും അദ്ദേഹം ചെന്നൈയില്‍ പ്രസ്താവനയില്‍ പറഞ്ഞു. അതേസമയം, ഏപ്രില്‍ 27ന് തമിഴ്നാട് തഞ്ചാവൂരിലെ കാളിമേട് ക്ഷേത്രത്തിലെ രഥോത്സവത്തിനിടെ വൈദ്യുതാഘാതമേറ്റ് രണ്ട് കുട്ടികള്‍ ഉള്‍പ്പടെ 11 പേര്‍ മരിച്ചിരുന്നു. രഥത്തില്‍ വൈദ്യുതി കമ്പി തട്ടിയാണ് അപകടമുണ്ടായത്. ഈ സംഭവം നടന്ന് മൂന്ന് ദിവസത്തിന് ശേഷം തമിഴ്നാട്ടിലെ തന്നെ നാഗപട്ടണം ജില്ലയില്‍ തിരുച്ചെങ്കട്ടംകുടിയില്‍ ക്ഷേത്രോത്സവത്തിനിടെ രഥത്തിന്റെ ചക്രത്തിനടിയില്‍പ്പെട്ട് തൊഴിലാളിയും മരിച്ചു. ഉത്തിരപശുപതീശ്വര ക്ഷേത്രത്തില്‍ ചിത്തിര ഉത്സവത്തിന്റെ ഭാഗമായി തേരോട്ടം നടക്കുന്നതിനിടെയായിരുന്നു അപകടം.