‘ചത്തിരിക്കുന്നു എന്ന് മറുപടി’; മൊഴി നിര്‍ണായകമായി; രമയുടെ കൊലപാതകത്തില്‍ ഭര്‍ത്താവ് അറസ്റ്റില്‍

അമ്പലപ്പുഴ: അമ്പലപ്പുഴയില്‍ വീട്ടമ്മ കൊലചെയ്യപ്പെട്ട സംഭവത്തില്‍ പ്രതി ഭര്‍ത്താവെന്നു പോലീസ്. കസ്റ്റഡിയിലുണ്ടായിരുന്ന ഭര്‍ത്താവ് പുറക്കാട് ഗ്രാമപ്പഞ്ചായത്ത് രണ്ടാം വാര്‍ഡില്‍ ശശി(66)യുടെ അറസ്റ്റ് പോലീസ് രേഖപ്പെടുത്തി. ഇയാളുടെ ഭാര്യ രമ(63)യാണ് കഴിഞ്ഞ ചൊവ്വാഴ്ച വീട്ടില്‍വെച്ചു കൊലചെയ്യപ്പെട്ടത്. സാഹചര്യത്തെളിവുകളുടെ അടിസ്ഥാനത്തിലാണ് ഇയാളാണു പ്രതിയെന്ന് പോലീസ് കണ്ടെത്തിയത്. രമയുടെ തലയ്ക്കേറ്റ പരിക്കിന്റെ കാഠിന്യത്തിലാണ് മരണം സംഭവിച്ചതെന്നാണ് പോസ്റ്റ്‌മോര്‍ട്ടം റിപ്പോര്‍ട്ട്. തലയില്‍ ആറും ശരീരത്തിനു മൂന്നും മുറിവുകളുണ്ടെന്ന് പോസ്റ്റ്‌മോര്‍ട്ടത്തില്‍ കണ്ടെത്തി. തലയില്‍ എങ്ങനെ മുറിവു വന്നെന്നാണ് പോലീസ് പരിശോധിച്ചത്. ഇതുമായി ബന്ധപ്പെട്ട് ശശിയെയും മകന്‍ ശരത്തിനെയും ചോദ്യംചെയ്തു. മകന്‍ ഉപദ്രവിച്ചതാകാമെന്നാണ് ശശി പോലീസിനോടു പറഞ്ഞത്. എന്നാല്‍, സംഭവം നടന്ന ദിവസം രാവിലെ എട്ടുമണിക്ക് ശരത് എം.ബി.എ.പരീക്ഷ എഴുതാന്‍ ചേര്‍ത്തലയ്ക്കു പോയതായി പോലീസ് കണ്ടെത്തി. ശശി രാവിലെ ഒന്‍പതരയ്ക്ക് ഉറക്കമുണര്‍ന്നപ്പോള്‍ ഭാര്യ തറയില്‍ മരിച്ചുകിടക്കുന്നതു കണ്ടതായാണ് ശശി മൊഴിനല്‍കിയത്. എന്നാല്‍, അന്നു രാവിലെ 9.45-ന് അനുജത്തി സുശീല, രമയെ ഫോണില്‍ വിളിച്ചപ്പോള്‍ അസ്വാഭാവികമായ നിലയിലായിരുന്നു സംസാരം. പത്തു സെക്കന്‍ഡ് സംസാരിച്ചശേഷം രമ മിണ്ടാതിരുന്നു. പിന്നെ ഫോണ്‍ കട്ടായി. സംശയവും ഭയവും തോന്നിയ സുശീല ഉടനെ ശശിയെ വിളിച്ചപ്പോള്‍ രമ ചത്തിരിക്കുന്നു എന്നായിരുന്നു മറുപടി. സുശീലയുടെ മൊഴിയും അന്വേഷണത്തില്‍ നിര്‍ണായകമായി. ശശിയെ ചോദ്യംചെയ്തപ്പോള്‍ പരസ്പരവിരുദ്ധമായ കാര്യങ്ങളാണു പറഞ്ഞത്. തറയില്‍ തെന്നിവീണെന്നും തറയില്‍ കിടന്നെന്നും കട്ടിലില്‍ കിടന്നെന്നുമൊക്കെ മാറ്റിപ്പറഞ്ഞു. കൊന്നിട്ടില്ലെന്നും അറിയിച്ചു. ഇതേത്തുടര്‍ന്ന് ശശിയുടെ മുന്‍കാലരീതികള്‍ പോലീസ് പരിശോധിച്ചു. ഭാര്യയോടും മകനോടും വൈരാഗ്യമുള്ളതായി പോലീസ് കണ്ടെത്തി. അന്വേഷണത്തിന്റെ ഭാഗമായി പ്രതിയുടെ വീട്ടിലെത്തിയ പോലീസ് സംഭവം പ്രതീകാത്മകമായി പുനഃസൃഷ്ടിച്ചു. മെഡിക്കല്‍ കോളേജ് ഫൊറന്‍സിക് സര്‍ജന്‍ ഡോ. സ്നേഹല്‍ അശോകും ഉണ്ടായിരുന്നു. മുറിവുകള്‍ വീഴ്ചയിലുണ്ടായതല്ലെന്ന് ഡോക്ടര്‍ അറിയിച്ചു. രമ 20 കൊല്ലമായി ആസ്ത്മയ്ക്കും പത്തുകൊല്ലമായി പാര്‍ക്കിന്‍സണിനും ചികിത്സയിലാണ്. പാര്‍ക്കിന്‍സണ്‍ നാലാംഘട്ടത്തിലാണ്. ഈ അവസ്ഥയില്‍ കൈകൊണ്ട് ശക്തിയായി ഇടിച്ചാല്‍ മരണപ്പെടുമെന്നു പോലീസ് കണ്ടെത്തി. ഇടിച്ചത് ആയുധംകൊണ്ടല്ല, കൈകൊണ്ടാണെന്ന് ഫൊറന്‍സിക് സര്‍ജനും അറിയിച്ചു. ശശിക്കെതിരേ 12 സാഹചര്യത്തെളിവുകള്‍ പോലീസ് കണ്ടെത്തി. ഇയാള്‍ ഭാര്യയെ നേരത്തേ പലതവണ ഇടിച്ചതായി അയല്‍വാസികളും ബന്ധുക്കളും പോലീസില്‍ മൊഴിനല്‍കി. മകനെ പഴിചാരി രക്ഷപ്പെടാനുള്ള ശ്രമം, പോസ്റ്റ്‌മോര്‍ട്ടം കൂടാതെ മൃതദേഹം സംസ്‌കരിക്കാനുള്ള നീക്കം എന്നിവയെല്ലാം സംശയത്തിനു വഴിയൊരുക്കിയിരുന്നു. ഡിവൈ.എസ്.പി. ബിജു വി. നായരുടെ നിര്‍ദേശപ്രകാരം ഇന്‍സ്പെക്ടര്‍ എസ്. ദ്വിജേഷും സംഘവുമാണ് പ്രതിയെ അറസ്റ്റുചെയ്തത്. എസ്.ഐ.മാരായ ടോള്‍സന്‍ പി. ജോസഫ്, ബൈജു, സി.പി.ഒ.മാരായ എം.കെ. വിനില്‍, ടോണി, രാജീവ്, ദിനു, അനീഷ് എന്നിവരും സംഘത്തിലുണ്ടായിരുന്നു. കോടതിയില്‍ ഹാജരാക്കിയ പ്രതിയെ റിമാന്‍ഡുചെയ്തു. ഇയാളെ കസ്റ്റഡിയില്‍ വാങ്ങുമെന്ന് പോലീസ് അറിയിച്ചു.