കോഴിക്കോട് പ്രണയപ്പകയില്‍ വെട്ടേറ്റ പെണ്‍കുട്ടിയുടെ ആരോഗ്യനിലയില്‍ നേരിയ പുരോഗതി

കോഴിക്കോട് നാദാപുരത്ത് പ്രണയപ്പകയില്‍ യുവാവിന്റെ വെട്ടേറ്റ പെണ്‍കുട്ടിയുടെ ആരോഗ്യനിലയില്‍ നേരിയ പുരോഗതി. പെണ്‍കുട്ടി മൊബൈല്‍ നമ്പര്‍ ബ്ലോക്ക് ചെയ്തതാണ് പ്രകോപനത്തിന് കാരണമെന്ന് പ്രതി റഫ്‌നാസ് പൊലീസിന് മൊഴി നല്‍കി. വിദ്യാര്‍ത്ഥിനി രാവിലെ കോളേജില്‍ പോകുമ്പോള്‍ ആക്രമിക്കാനായിരുന്നു പ്രതിയുടെ ആദ്യ പദ്ധതി. കോഴിക്കോട്ടെ സ്വകാര്യ ആശുപത്രിയില്‍ ചികിത്സയില്‍ കഴിയുന്ന ഇരുപതുകാരിയുടെ ആരോഗ്യനിലയില്‍ നേരിയ പുരോഗതി. അറസ്റ്റ് ചെയ്ത പ്രതിയെ കോടതി റിമാന്‍ഡ് ചെയ്തു. പെണ്‍കുട്ടി തന്നില്‍ നിന്ന് ഒഴിഞ്ഞു മാറിയതും ഫോണ്‍ ബ്ലോക്ക് ചെയ്തതുമാണ് പ്രകോപന കാരണമെന്നാണ് പ്രതി റഫ്‌നാസിന്റെ മൊഴി. തെളിവെടുപ്പിനിടെയാണ് പ്രതി ഇക്കാര്യം പൊലീസിനോട് പറഞ്ഞത്. പെണ്‍കുട്ടിയെ ക്രൂരമായി ആക്രമിച്ച പ്രതി കുറ്റബോധം പോലും പ്രകടിപ്പിച്ചില്ലെന്ന് പൊലീസ് പറഞ്ഞു. പ്രതി കൃത്യമായ പദ്ധതികള്‍ തയ്യാറാക്കിയാണ് കൃത്യത്തിന് എത്തിയത്. കൊടുവാളും പെട്രോളുമായി രാവിലെ തന്നെ റഫ്നാസ് ബൈക്കില്‍ പെണ്‍കുട്ടിയുടെ വീടിന് സമീപം എത്തി. കോളേജിലേക്ക് പോകുംവഴിയില്‍ വിദ്യാര്‍ത്ഥിനിയെ ആക്രമിക്കുകയായിരുന്നു ലക്ഷ്യം. എന്നാല്‍ പെണ്‍കുട്ടിയുടെ കൂടെ പിതാവ് ഉണ്ടായിരുന്നതിനാല്‍ പദ്ധതി നടന്നില്ല. പിന്നീട് ഉച്ചയ്ക്ക് പെണ്‍കുട്ടി സഞ്ചരിച്ച ബസിനെ ബൈക്കില്‍ പിന്തുടര്‍ന്നാണ് ആക്രമിക്കാന്‍ എത്തിയത്. വെട്ടി വീഴ്ത്തിയ ശേഷം പെട്രോള്‍ ഒഴിച്ച് കത്തിക്കുകയായിരുന്നു ലക്ഷ്യം. കാറിലെത്തിയ നാല് യുവാക്കള്‍ തടഞ്ഞതിനാല്‍ പെട്രോള്‍ ഉപയോഗിക്കാനായില്ല.