വീട്ടമ്മയുടെ മരണം കൊലപാതകം: ഭര്‍ത്താവിനെയും മകനെയും ചോദ്യംചെയ്യുന്നു

അമ്പലപ്പുഴ വീണു പരുക്കേറ്റെന്നു പറഞ്ഞ് ഭര്‍ത്താവ് മെഡിക്കല്‍ കോളജ് ആശുപത്രിയിലെത്തിച്ച വീട്ടമ്മ മരിച്ചു. തലയ്‌ക്കേറ്റ പരുക്കു കാരണമാണ് മരിച്ചതെന്ന് പോസ്റ്റ്‌മോര്‍ട്ടത്തില്‍ കണ്ടെത്തിയതോടെ കൊലപാതകമെന്ന സൂചനയില്‍ ഭര്‍ത്താവിനെയും ഇളയ മകനെയും പൊലീസ് ചോദ്യം ചെയ്യുന്നു. അമ്പലപ്പുഴ തെക്കേനട കരൂര്‍ ശ്യാംനിവാസില്‍ ശശിയുടെ ഭാര്യ രമയാണ് (63) ചൊവ്വാഴ്ച രാവിലെ വീട്ടില്‍ മരിച്ചത്. രമയുടെ നെറ്റിയിലെ മുറിവു കണ്ട് ഇളയമകന്‍ ശരത് മരണത്തില്‍ സംശയം ഉന്നയിച്ചിരുന്നു. എന്നാല്‍, ശരത് രമയെ മര്‍ദിച്ചെന്നു ശശി പറഞ്ഞതിനെ തുടര്‍ന്ന് ശരത്തിനെയും പൊലീസ് ചോദ്യം ചെയ്യുകയാണ്. രമയുടെ നെറ്റിയിലും തലയിലും മറ്റും കണ്ടെത്തിയ 5 മുറിവുകളാണ് മരണകാരണമെന്ന് പൊലീസ് പറയുന്നു. മൂര്‍ച്ചയില്ലാത്ത ഉപകരണം കൊണ്ടുള്ള മര്‍ദനത്തില്‍ ആന്തരിക രക്തസ്രാവമുണ്ടായതാണ് മരണ കാരണം. എംബിഎ വിദ്യാര്‍ഥിയായ ശരത് രാവിലെ പരീക്ഷയ്ക്ക് പോയ ശേഷം 10.20ന് ആണ് ആംബുലന്‍സ് വിളിച്ച് ശശി രമയെ ആശുപത്രിയില്‍ എത്തിച്ചത്. പാര്‍ക്കിന്‍സണ്‍സ് രോഗമുള്ള രമ കസേരയില്‍നിന്നു വീണെന്നാണ് ശശി ആശുപത്രിയില്‍ അറിയിച്ചത്. നെറ്റിയിലെയും തലയിലെയും മുറിവുകള്‍ വീഴ്ചയില്‍ ഉണ്ടായതാണെന്നും പറഞ്ഞു. അത്യാഹിത വിഭാഗത്തിലെ ഡോക്ടര്‍മാര്‍ മരണം സ്ഥിരീകരിച്ചു. തുടര്‍ന്ന് അമ്പലപ്പുഴ പൊലീസിന്റെ ക്ലിയറന്‍സ് സര്‍ട്ടിഫിക്കറ്റ് വാങ്ങി മൃതദേഹം വീട്ടിലേക്ക് കൊണ്ടു പോകാന്‍ ശശി ശ്രമിച്ചെന്നു പൊലീസ് പറയുന്നു.വിവരമറിഞ്ഞ് എത്തിയ ശരത് മാതാവിന്റെ നെറ്റിയിലെ മുറിവു കണ്ട് സംശയം ഉന്നയിച്ചു. അതോടെ മൃതദേഹം മോര്‍ച്ചറിയിലേക്ക് മാറ്റി. ഇന്നലെ ഉച്ചയോടെ പോസ്റ്റ്‌മോര്‍ട്ടം പൂര്‍ത്തിയാക്കി ഫൊറന്‍സിക് വിഭാഗം ഡോക്ടര്‍മാര്‍ കൊലപാതകമെന്ന നിഗമനം പൊലീസിനെ അറിയിച്ചു. തുടര്‍ന്ന് ശശിയെ പൊലീസ് ചോദ്യം ചെയ്തപ്പോള്‍ മകനാണ് രമയെ മര്‍ദിച്ചതെന്ന് ശശി പറഞ്ഞു. ഇതോടെയാണ് ശരത്തിനെയും ചോദ്യം ചെയ്യാന്‍ വിളിച്ചത്. രമയുടെ ആന്തരികാവയവങ്ങള്‍ ഫൊറന്‍സിക് ലബോറട്ടറിയിലേക്ക് അയച്ചു. മൃതദേഹം സംസ്‌കരിച്ചു. ശ്യാമാണ് ഇവരുടെ മൂത്ത മകന്‍.