എല്ലാ സൂം ക്ലാസ്സിലും പങ്കെടുത്തു; ബിരുദം ഒരുമിച്ച് ആഘോഷിച്ച് വളര്‍ത്തുപൂച്ചയും ഉടമയും….

കൊവിഡും ലോക്ക്ഡൗണും വ്യത്യസ്തമായ ഒരു ജീവിത രീതിയാണ് നമുക്ക് മുന്നിലേക്ക് തുറന്നു തന്നത്. വര്‍ക്ക് ഫ്രം ഹോമും ഓണ്‍ലൈന്‍ ക്ളാസ്സുകളും നമ്മുടെ ജീവിതത്തിന്റെ തന്നെ ഭാഗമായി. ഒരിക്കലും കടന്നുപോകാത്ത സമയത്തിലൂടെയാണ് കൊറോണ കാലം നമ്മെ കൊണ്ടുപോയത്. മിക്കവരും തങ്ങളുടെ ക്ളാസുകളും കോളേജുമെല്ലാം പൂര്‍ത്തിയാക്കിയത് സൂം കോളിലൂടെയാണ്. എന്നാല്‍ സൂം കോളിലൂടെ ബിരുദം നേടിയ വളര്‍ത്തുപൂച്ചയാണ് ഇപ്പോള്‍ സോഷ്യല്‍ മീഡിയയില്‍ ശ്രദ്ധ നേടുന്നത്. ഫ്രാന്‍സെസ ബോര്‍ഡിയര്‍ എന്ന യുവതിയാണ് പൂച്ചയുടെ ഉടമ. സുകി എന്നാണ് പ്രിയപ്പെട്ട പൂച്ചയുടെ പേര്. ഫ്രാന്‍സെസയ്‌ക്കൊപ്പം എല്ലാ ഓണ്‍ലൈന്‍ ക്ളാസുകളിലും ഈ പൂച്ച പങ്കെടുത്തിരുന്നു. അടുത്തിടെ ഓസ്റ്റിനിലെ ടെക്‌സസ് സര്‍വകലാശാലയില്‍ നിന്ന് ബിരുദം നേടിയത് ഫ്രാന്‍സെസ സോഷ്യല്‍ മീഡിയയില്‍ കുറിച്ച രസകരമായ വാര്‍ത്തയാണ് സോഷ്യല്‍ മീഡിയയില്‍ ചര്‍ച്ചയായത്. തന്റെ കോളേജ് കാലത്തിന്റെ ഭൂരിഭാഗവും സുകിയോടൊപ്പം വീട്ടിലാണ് ഫ്രാന്‍സെസ ചെലവഴിച്ചത്. അതുകൊണ്ട് തന്നെ എല്ലാ ക്ളാസിലും സൂകിയും ഫ്രാന്‍സെസക്കൊപ്പം ഉണ്ടായിരുന്നു. അങ്ങനെയാണ് കോഴ്സിലെ എല്ലാ സൂം ലെക്ചറിലും പങ്കെടുത്ത ഒരു അര്‍പ്പണബോധമുള്ള വിദ്യാര്‍ത്ഥിയായി സുകി എന്ന പൂച്ചയും മാറിയത്. എന്തായാലും മോര്‍ട്ടാര്‍ ബോര്‍ഡ് തൊപ്പിയും ഗൗണും ധരിച്ച പൂച്ചയ്ക്കൊപ്പമുള്ള ചിത്രങ്ങള്‍ ഫ്രാന്‍സെസ പോസ്റ്റ് ചെയ്തതോടെയാണ് ഈ ബിരുദം ചര്‍ച്ചയായത്. 'ഞാന്‍ നടത്തിയ എല്ലാ സൂം ക്ലാസ്സുകളിലും എന്റെ പൂച്ച പങ്കെടുത്തിരുന്നു, അതിനാല്‍ ഞങ്ങള്‍ രണ്ടുപേരും ഓസ്റ്റിനിലെ ടെക്‌സസ് സര്‍വകലാശാലയില്‍ നിന്ന് ബിരുദം നേടും,'' എന്ന തലക്കെട്ടോടെയാണ് ഫ്രാന്‍സെസ ചിത്രം പങ്കുവെച്ചത്. 'കൊറോണക്കാലമായതിനാല്‍ ഞാന്‍ കൂടുതല്‍ സമയവും ചെലവഴിച്ചത് എന്റെ അപ്പാര്‍ട്ട്‌മെന്റില്‍ ആയിരുന്നു. അപ്പോഴെല്ലാം ഒപ്പം എന്റെ പൂച്ചയും ഉണ്ടായിരുന്നു. ഞാന്‍ പങ്കെടുക്കുന്ന സൂം ക്ലാസുകളിലെല്ലാം അവള്‍ അത് കേള്‍ക്കാന്‍ ആഗ്രഹിച്ചതുപോലെ, എപ്പോഴുംഎനിക്കൊപ്പം ഇരിക്കുമായിരുന്നു എന്നും ഉടമയായ ഫ്രാന്‍സെസ പറയുന്നു. എന്താണെങ്കിലും പൂച്ചയ്ക്ക് നല്‍കിയ ഈ രസകരമായ വിശേഷമാണ് ഇപ്പോള്‍ സോഷ്യല്‍ മീഡിയയില്‍ ചര്‍ച്ചാവിഷയം.