വയസ്സ് 108, ‘സൂപ്പര്‍ സീനിയര്‍’ വോട്ടറായി ആസിയ; തൃക്കാക്കര പോളിങ്ങിലെ താരം !

നൂറ്റിയെട്ടു വയസ്സിലും വോട്ടെന്നു കേട്ടാല്‍ ആസിയ ഉമ്മയ്ക്ക് ആവേശമാണ്. തൃക്കാക്കര മണ്ഡലത്തിലെ ഏറ്റവും പ്രായം കൂടിയ വോട്ടറാണ് ആസിയ. മണ്ഡലത്തിലെ വിവിധ തലമുറകള്‍ കണ്ട ആസിയ ബന്ധുക്കളുടെ സഹായത്തോടെയാണ് രാവിലെ തന്നെ ബൂത്തിലെത്തി വോട്ടു രേഖപ്പെടുത്തിയത്. മണ്ഡലത്തിലെ 100 കഴിഞ്ഞ 22 വോട്ടര്‍മാരില്‍ ഒരാളാണ് ആസിയ. കാളപ്പെട്ടിയും കുരുവിപ്പെട്ടിയുമൊക്കെ കടന്നു സാധാരണ ബാലറ്റ് പെട്ടിയിലൂടെ വോട്ടിങ് യന്ത്രത്തില്‍ എത്തി നില്‍ക്കുന്ന തിരഞ്ഞെടുപ്പു ചരിത്രത്തിനൊപ്പം സഞ്ചരിച്ച ആസിയയ്ക്കു വോട്ട് ചരിത്രത്തേക്കാള്‍ പ്രായമുണ്ട്. പടമുകള്‍ കുന്നുംപുറം നെയ്‌തേലിയില്‍ പരേതനായ അഹമ്മദിന്റെ ഭാര്യയാണ്. ഇഷ്ടമുള്ള പാര്‍ട്ടിയും ചിഹ്നവുമുണ്ടെങ്കിലും ഏതെന്നു ചോദിച്ചാല്‍ ആ രഹസ്യം ആസിയ ചിരിയിലൊതുക്കും. സ്വാതന്ത്ര്യത്തിനു മുന്‍പ് കളര്‍ ബോക്‌സ് സംവിധാനത്തിലൂടെയുള്ള വോട്ടിങ് രീതികള്‍ നാട്ടിലുണ്ടായിരുന്നുവെന്നാണ് ആസിയയുടെ നേരിയ ഓര്‍മ. സ്ഥാനാര്‍ഥിയുടെ പേരും ചിഹ്നവും പതിച്ച ബാലറ്റ് പെട്ടിയില്‍ വോട്ടിട്ടാണ് ആസിയ വോട്ട് ചെയ്തു തുടങ്ങിയത്. പിന്നീടു സാധാരണ ബാലറ്റിലേക്കും യന്ത്രത്തിലേക്കും തിരഞ്ഞെടുപ്പ് വഴി മാറിയതൊക്കെ പുതിയ ചരിത്രം. സമീപകാല തിരഞ്ഞെടുപ്പുകളിലൊക്കെ വോട്ടിങ് യന്ത്രത്തില്‍ വോട്ട് രേഖപ്പെടുത്തിയ ആസിയയ്ക്കു കഴിഞ്ഞ നിയമസഭ തിരഞ്ഞെടുപ്പില്‍ വീണ്ടും ബാലറ്റ് പേപ്പര്‍ കയ്യില്‍ കിട്ടി. 80 വയസു കഴിഞ്ഞവര്‍ക്കു കോവിഡ് മുന്‍നിര്‍ത്തി തപാല്‍ വോട്ട് ഏര്‍പ്പെടുത്തിയപ്പോഴാണത്. ഇത്തവണത്തെ സ്ഥാനാര്‍ഥികളെ കുറിച്ചു മക്കളും പേരക്കുട്ടികളും അവരുടെ മക്കളും ആസിയയ്ക്ക് ഏകദേശ ധാരണ നല്‍കിയിരുന്നു. വീടിനകത്ത് ഊന്നുവടിയുടെ സഹായത്തോടെയാണു നടപ്പ്. വാഴക്കാല മാനാത്ത് കുറ്റിക്കാട്ട് കൊച്ചുണ്ണിയുടെ മകളാണ്. പതിനാലാം വയസ്സിലാണു ബന്ധു കൂടിയായ അഹമ്മദ് വിവാഹം ചെയ്തത്. 12 മക്കളില്‍ നാലു പേര്‍ മരിച്ചു. ഇളയ മകനും തൃക്കാക്കര സാംസ്‌കാരിക കേന്ദ്രം ജനറല്‍ സെക്രട്ടറിയുമായ സലിം കുന്നുംപുറത്തിനൊപ്പമാണിപ്പോള്‍ താമസം.