ബ്രിക്‌സ് രാജ്യങ്ങളുടെ വിദേശകാര്യമന്ത്രിമാരുടെ യോഗം ഇന്ന്; ചൈന ആതിഥേയത്വം വഹിക്കും

ബ്രിക്‌സ് രാജ്യങ്ങളുടെ വിദേശകാര്യമന്ത്രിമാരുടെ യോഗം ഇന്ന് നടക്കും. ഓണ്‍ലൈന്‍ ആയി നടക്കുന്ന യോഗത്തില്‍ വിദേശകാര്യമന്ത്രി എസ് ജയശങ്കര്‍ പങ്കെടുക്കും. ചൈനയാണ് യോഗത്തിനു ആതിഥേയത്വം വഹിക്കുന്നത്. റഷ്യ യുക്രൈന്‍ യുദ്ധത്തിനു ശേഷമുള്ള ബ്രിക്‌സിന്റെ ആദ്യ യോഗമാണിത്. കൊവിഡ് മഹാമാരിക്ക് ശേഷം സാമ്പത്തിക രംഗത്തെ തിരിച്ചു വരവാണ് യോഗത്തിന്റ മുഖ്യ അജണ്ട എന്ന് ചൈനീസ് വിദേശകാര്യ മന്ത്രി വാങ് യി അറിയിച്ചു. അടുത്ത മാസം നടക്കുന്ന ബ്രിക്‌സ് ഉച്ചകോടിക്ക് മുന്നോടിയായാണ് യോഗം. ഇന്ത്യന്‍ വിദേശകാര്യ മന്ത്രി എസ് ജയശങ്കര്‍, ചൈനീസ് വിദേശകാര്യമന്ത്രി വാങ് യി, റഷ്യയുടെ സെര്‍ജി ലാവ്റോവ്, ബ്രസീലിന്റെ കാര്‍ലോസ് ആല്‍ബര്‍ട്ടോ ഫ്രാന്‍സ്, ദക്ഷിണാഫ്രിക്കയുടെ നലേദി പാണ്ടര്‍ എന്നിവര്‍ യോഗത്തില്‍ പങ്കെടുക്കും. അഞ്ച് രാജ്യങ്ങളും ''ബ്രിക്‌സ് പ്ലസ് ഡയലോഗില്‍'' പങ്കെടുക്കുമെന്നും വികസ്വര രാജ്യങ്ങള്‍ക്ക് ആഗോള ഭരണത്തില്‍ കൂടുതല്‍ പ്രാധാന്യം നല്‍കുന്നതിനുള്ള ഐക്യദാര്‍ഢ്യ സന്ദേശം നല്‍കുമെന്നും ചൈനീസ് വിദേശകാര്യ മന്ത്രാലയ വക്താവ് വാങ് വെന്‍ബിന്‍ പറഞ്ഞു.