ഉപരോധം: അമേരിക്കന്‍ എക്സ്പ്രസും നെറ്റ്ഫ്ളിക്സും ടിക്ക് ടോക്കും റഷ്യയിലെ പ്രവര്‍ത്തനം നിര്‍ത്തി

മോസ്‌കോ: യുക്രൈന്‍ അധിനിവേശത്തിന്റെ പശ്ചാത്തലത്തില്‍ റഷ്യയ്ക്ക് വിവിധ രാജ്യങ്ങളില്‍ ഉപരോധമേര്‍പ്പെടുത്തല്‍ തുടരുകയാണ്. ധനകാര്യ സ്ഥാപനങ്ങള്‍ക്ക് പിന്നാലെ ഒടിടി പ്ലാറ്റ് ഫോമായ നെറ്റഫ്‌ലിക്‌സും ഹ്രസ്വ വീഡിയോ ആപ്ലിക്കേഷനായ ടിക് ടോകും റഷ്യയിലെ സേവനം പൂര്‍ണമായും നിര്‍ത്തി. യുക്രൈനില്‍ റഷ്യ നടത്തുന്ന അധിനിവേശത്തിന്റെ സാഹചര്യത്തില്‍ റഷ്യയിലെ തങ്ങളുടെ സേവനം നിര്‍ത്തുകയാണെന്ന് നെറ്റ്ഫ്‌ലിക്‌സ് വക്താവ് പറഞ്ഞതായി ഇന്‍ഡിപെന്‍ഡന്റ് റിപ്പോര്‍ട്ട് ചെയ്യുന്നു. യുഎസ് ക്രഡിറ്റ് കാര്‍ഡ്, പേയ്‌മെന്റ് ഭീമന്മാരായ അമേരിക്കന്‍ എക്‌സ്പ്രസ്സും റഷ്യയിലെ പ്രവര്‍ത്തനം നിര്‍ത്തി. റഷ്യയിലേയും ബെലാറുസിലേയും പ്രവര്‍ത്തമാണ് അമേരിക്കന്‍ എക്‌സ്പ്രസ് നിര്‍ത്തിയത്. രാജ്യത്തിന് പുറത്തുള്ള റഷ്യയുടെ ബാങ്കുകളിലും സേവനം ലഭ്യമാകില്ല. ധനകാര്യ സേവന സ്ഥാപനങ്ങളായ വിസയും മാസ്റ്റര്‍കാര്‍ഡും നേരത്തെ തന്നെ റഷ്യയുമായുള്ള ഇടപാടുകള്‍ മരവിപ്പിച്ചിരുന്നു. യു.എസ്. മള്‍ട്ടിനാഷണല്‍ കമ്പനികളായ ഇവ കാര്‍ഡ് വഴിയുള്ള പണമിടപാടിലെ ആഗോള കുത്തകകളാണ്. യുക്രൈന്‍ അധിനിവേശത്തിന്റെ പേരിലാണ് റഷ്യയിലെ ഇടപാടുകള്‍ മരവിപ്പിക്കുന്നതെന്ന് ഇരു കമ്പനികളും അറിയിച്ചു. റഷ്യന്‍ ബാങ്കുകള്‍ അനുവദിച്ച കാര്‍ഡുകള്‍ ഇനിമേല്‍ വിദേശരാജ്യങ്ങളില്‍ നിഷ്‌ക്രിയമായിരിക്കുമെന്ന് രണ്ടു കമ്പനികളും അറിയിച്ചു. വിദേശത്തെ ബാങ്കുകള്‍ അനുവദിച്ച വിസ, മാസ്റ്റര്‍കാര്‍ഡുകളില്‍ റഷ്യയിലും ഇടപാടുകള്‍ നടത്താനാവില്ല. റഷ്യയിലുള്ള ഇരുനൂറോളം ജീവനക്കാര്‍ക്ക് കാര്‍ഡുപയോഗിച്ച് ഇടപാടുകള്‍ നടത്താമെന്ന് മാസ്റ്റര്‍കാര്‍ഡ് പറഞ്ഞു. കാലാവധി കഴിയുംവരെ രണ്ടു കാര്‍ഡുകളും റഷ്യയില്‍ ഉപയോഗിക്കാനാകുമെന്ന് റഷ്യന്‍ സെന്‍ട്രല്‍ ബാങ്കും എസ്ബെര്‍ബാങ്കും അവകാശപ്പെട്ടു.