റഷ്യന്‍ അനുകൂല നയം: പാക് ദേശീയ ഉപദേഷ്ടാവിന്റെ സന്ദര്‍ശനം യു.കെ റദ്ദാക്കി

യുക്രൈനിലെ റഷ്യന്‍ അധിനിവേശത്തെ പിന്തുണയ്ക്കുന്ന പാകിസ്താന്‍ നയത്തില്‍ പ്രതിഷേധിച്ച് ദേശീയ സുരക്ഷ ഉപദേഷ്ടാവ് മുഈദ് യൂസുഫിന്റെ സന്ദര്‍ശനം യു.കെ റദ്ദാക്കി. അടുത്ത ആഴ്ച നടത്താന്‍ നിശ്ചയിച്ചിരുന്ന സന്ദര്‍ശനം യു.കെ സര്‍ക്കാര്‍ ഏകപക്ഷീയമായാണ് റദ്ദാക്കിയതെന്ന് അന്താരാഷ്ട്ര മാധ്യമങ്ങള്‍ റിപ്പോര്‍ട്ട് ചെയ്തു. യുദ്ധ പശ്ചാത്തലത്തില്‍ യു.എന്‍ ജനറല്‍ അസംബ്ലിയിലെ പ്രത്യേക സെഷനില്‍ റഷ്യന്‍ നടപടിയെ അപലപിക്കണമെന്ന് പാകിസ്താനില്‍ പ്രവര്‍ത്തിക്കുന്ന യൂറോപ്യന്‍ യൂണിയന്റെ വിദേശ ദൗത്യ സംഘത്തലവന്മാര്‍ അഭ്യര്‍ഥിച്ചിരുന്നെങ്കിലും പാക് സര്‍ക്കാര്‍ വഴങ്ങിയിരുന്നില്ല. യു.കെയുടെ നടപടി നയതന്ത്ര വിരുദ്ധവും അസ്വീകാര്യവുമാണെന്ന് പാകിസ്താന്‍ പ്രതികരിച്ചു. അതേസമയം യുക്രൈനില്‍ റഷ്യന്‍ അധിനിവേശം തുടരുമ്പോള്‍ സമാധാന ചര്‍ച്ചയ്ക്കൊരുങ്ങി ഇരു രാജ്യങ്ങളും. റഷ്യ-യുക്രെയ്ന്‍ മൂന്നാം ഘട്ട സമാധാന ചര്‍ച്ച തിങ്കളാഴ്ച നടക്കും. ചര്‍ച്ചയ്ക്ക് യുക്രൈന്‍ സന്നദ്ധത അറിയിച്ചിരുന്നു. സേനാപിന്മാറ്റമടക്കമുള്ള വിഷയങ്ങളിലാണ് ചര്‍ച്ച നടക്കുക. നേരത്തെ നടന്ന രണ്ടാം വട്ട ചര്‍ച്ചയില്‍ യുക്രൈനില്‍ കുടുങ്ങിക്കിടക്കുന്ന സാധാരണക്കാരെ ഒഴിപ്പിക്കാന്‍ ധാരണയായിരുന്നു. മൂന്നു മണിക്കൂര്‍ നീണ്ട ചര്‍ച്ചയ്‌ക്കൊടുവില്‍ മനുഷത്വ ഇടനാഴിയില്‍ തീരുമാനമായെന്ന് യുക്രൈന്‍ പ്രതിനിധി അറിയിച്ചിരുന്നു. എന്നാല്‍ രണ്ടാംവട്ട ചര്‍ച്ചയിലും തൃപ്തനല്ലെന്നും അദ്ദേഹം വ്യക്തമാക്കിയിരുന്നു.