ഇമചിമ്മും വേഗത്തില്‍ തകര്‍ന്നത്, ഒരു പതിറ്റാണ്ടിന്റെ പ്രയത്‌നം

അധിനിവേശ റഷ്യന്‍ സൈന്യത്തിനെതിരായ യുദ്ധത്തില്‍ തകരുന്ന യുക്രൈന്‍ ജനതയ്ക്ക് പറയാന്‍ നിരവധി കഥകളുണ്ട്. അക്കൂട്ടത്തില്‍ ഒരു കഥയാണ് ഖാര്‍കിവ് മൃഗശാലയ്ക്ക് പങ്കുവെയ്ക്കാനുള്ളത്. ഖാര്‍കിവിന്റെ ഫെല്‍ഡ്മാന്‍ ഇക്കോപാര്‍ക്ക് നിര്‍മ്മിക്കാന്‍ 10 വര്‍ഷമെടുത്തു. ഇതാണ് നിമിഷനേരം കൊണ്ട് റഷ്യന്‍ മിസൈല്‍ ആക്രമണത്തില്‍ തകര്‍ന്നത്. ഏകദേശം 2,000 മൃഗങ്ങള്‍ വസിക്കുന്ന ഈ മൃഗശാല നഗരത്തിന് പുറത്ത് 354 ഏക്കറിലധികം വ്യാപിച്ചുകിടക്കുന്നു. യുദ്ധം ആരംഭിക്കുന്നതിന് ഒരു ദിവസം മുമ്പ് വരെ മൃഗങ്ങള്‍ക്ക് ഭക്ഷണം കൊടുക്കുന്നതും, അവരത് ആസ്വദിച്ച് കഴിക്കുന്ന വീഡിയോയും മൃഗശാലയുടെ ഫേസ്ബുക്ക് പേജില്‍ പങ്കുവെച്ചിരുന്നു. അടുത്ത ദിവസം ഉണ്ടായ മിസൈല്‍ ആക്രമണത്തില്‍ മൃഗങ്ങള്‍ കൊല്ലപ്പെടുകയും മറ്റുള്ളവയ്ക് പരുക്കേല്‍ക്കുകയും ചെയ്തു. അധിനിവേശത്തിന്റെ ആദ്യ ദിവസം റഷ്യന്‍ ഷെല്ലാക്രമണത്തില്‍ കുരങ്ങുകള്‍, മുള്ളന്‍പന്നികള്‍, റാക്കൂണുകള്‍ എന്നിവയുടെ ഗ്ലാസ് കൂടുകള്‍ തകര്‍ത്തു. പരുക്കേറ്റ മൃഗങ്ങളില്‍ പലതും ചത്തു. മഴപോലെ പെയ്തിറങ്ങിയ മിസൈലുകള്‍ക്ക് ഇടയിലും ചിലതിനെ രക്ഷിച്ച് മൃഗപാലകര്‍ കാട്ടിലേക്ക് അയച്ചു. എന്നാല്‍ ഒരു യുദ്ധത്തിനുപോലും പുതുജീവന്‍ പിറക്കുന്നത് തടയാനാവില്ല. മൃഗശാലയിലെ കിയാങ്സ് ഒരു കുഞ്ഞിനെ പ്രസവിച്ചു. ഖാര്‍കിവ് മൃഗശാലയ്ക്ക് കീവിന്റെ മൂന്നര ഇരട്ടി വലുപ്പമുണ്ട്. പകുതിയോളം മൃഗങ്ങളുടെ ആവാസ കേന്ദ്രവുമാണ്.