ഈ ത്രിമൂര്‍ത്തികള്‍ക്ക് ശേഷം അഭ്രപാളിയില്‍ കോട്ടയത്തിന്റെ കൈയൊപ്പ്

ഹാസ്യ ചക്രവര്‍ത്തി എസ് പി പിള്ള, ആലുമ്മൂടന്‍, കടുവാക്കുളം ആന്റണി... ഈ ത്രിമൂര്‍ത്തികള്‍ക്ക് ശേഷം അഭ്രപാളിയില്‍ കോട്ടയത്തിന്റെ കൈയൊപ്പ് -- അകാലത്തില്‍ അന്തരിച്ച കോട്ടയം പ്രദീപിനെ അങ്ങനെ വിശേഷിപ്പിക്കാം. പ്രദീപിന്റെ തനതും സവിശേഷവുമായ അഭിനയശൈലി പുതുതലമുറയ്ക്ക് നന്നേ ഇഷ്ടപ്പെട്ടു. താളത്തിലുള്ള ആ സംഭാഷണചാതുരി കുട്ടികളുടെ ഹൃദയത്തില്‍ ഇടംപിടിച്ചു. അത് നിര്‍മാതാക്കളും സംവിധായകരും തിരിച്ചറിഞ്ഞത് പ്രദീപിന്റെ ഭാഗ്യം. ചുരുങ്ങിയ കാലംകൊണ്ട് ചെറുവേഷങ്ങളിലൂടെ 200ഓളം ചിത്രങ്ങളില്‍ തിളങ്ങിയ ഈ കലാകാരന്‍ മുഖ്യധാരാ സിനിമയില്‍ ഇരിപ്പിടം ഉറപ്പിച്ചത് വളരെ പെട്ടെന്നാണ്. മണ്‍മറഞ്ഞ ശുദ്ധനും സ്നേഹധനനുമായ ആ കലാകാരന് തുല്യനായി അദ്ദേഹം മാത്രം -- സുഹൃത്തുക്കള്‍ പറഞ്ഞു. 'നിപ' അവസാന ചിത്രങ്ങളില്‍ ശ്രദ്ധേയം... ഏറ്റവും ഒടുവില്‍ പ്രദീപ് അഭിനയിച്ച് പൂര്‍ത്തിയാക്കിയ ചിത്രങ്ങളില്‍ ശ്രദ്ധേയം എന്ന് പറയാവുന്നത് പത്രപ്രവര്‍ത്തകന്‍ ബെന്നി ആശംസ സംവിധാനം നിര്‍വ്വഹിച്ച 'നിപ' ആണ്. ഈ സിനിമയുമായി ബന്ധപ്പെട്ട് ഒരു ഫോട്ടോ ഷൂട്ടിന് ഫെബ്രു. 17ന് പകല്‍ കോട്ടയത്ത് എത്താനിരിക്കെ തലേന്നാണ് പ്രദീപിന്റെ വിടവാങ്ങല്‍. പ്രദീപുമായുള്ള സൗഹൃദം സംവിധായകന്‍ ബെന്നി ഇങ്ങനെ ഓര്‍ത്തെടുത്തു... മഹാമാരിക്കാലത്ത് അടച്ചുപൂട്ടിയ, പഴയകാല സിനിമാക്കാരുടെ താവളം ബെസ്റ്റോട്ടലിലായിരുന്നു അഭിനേതാക്കളായ കോട്ടയം പത്മനും പ്രദീപും ഞാനും സംഗമിച്ചിരുന്നത്. പത്രപ്രവര്‍ത്തകനായ സുരേഷ് അണ് പ്രദീപിനെ പരിചയപ്പെടുത്തിതന്നത്. ബെന്നിച്ചന്റെ സിനിമയില്‍ എനിക്കൊരു 'വില്ലന്‍ വേഷം' തരണമെന്ന് പ്രദീപ് പലവുരു പറഞ്ഞിട്ടുണ്ട്. ചില സുഹൃത്തുക്കളുടെ മറ്റ് സിനിമകളിലെ വേഷങ്ങള്‍ക്ക് ഞാന്‍ ശുപാര്‍ശ ചെയ്തിട്ടുമുണ്ട്. അത്തരം വര്‍ക്കുകള്‍ക്കൊന്നും കണക്ക് പറഞ്ഞ് പ്രതിഫലം വാങ്ങാതെ കൊടുക്കുന്നതും വാങ്ങി പോരുന്നയാളാണ് പ്രദീപ്. എല്‍ഐസിയില്‍ ജോലി ചെയ്യുന്ന എന്റെ അനുജന്‍ ബിനോയിയെ കാണാന്‍ പോകുമ്പോള്‍ പ്രദീപിനെയും കാണുമായിരുന്നു. വില്ലന്‍ വേഷത്തിന്റെ കാര്യം അപ്പോഴെല്ലാം ഓര്‍മ്മിപ്പിക്കും. അങ്ങനെയാണ് 'നിപ'യിലെ ചതിയനായ അമ്മാവന്റെ വ്യത്യസ്ത വേഷം പ്രദീപിന് നല്‍കിയത്. ഇത്വരെ എല്ലാവരെയും ചിരിപ്പിച്ച പ്രദീപിന്റെ 'നിപ'യിലെ ക്രൗര്യഭാവം അദ്ദേഹം ഗംഭീരമാക്കി. കോട്ടയം പത്മനൊപ്പം ഒരു ഫോട്ടോ ഷൂട്ടിനായി എറണാകുളത്ത് നിന്ന് വ്യാഴാഴ്ച ഉച്ചയ്ക്ക് മുമ്പ് എത്താമെന്നാണ് പ്രദീപ് പറഞ്ഞത്. പക്ഷേ... 'നിപ' ടീമിന് താങ്ങാനാവുന്നതല്ല പ്രദീപിന്റെ മരണം -- ബെന്നി പറഞ്ഞ്നിര്‍ത്തി. 'നിപ' മാര്‍ച്ചില്‍ റിലീസിന് ഒരുങ്ങുകയാണ്. കോട്ടയത്തെ ഹിമുക്രി (ഹിന്ദു -- മുസ്ലിം -- ക്രിസ്ത്യന്‍) ക്രിയേഷന്‍സാണ് നിര്‍മാണം. സലിംകുമാര്‍, ബാബു ആന്റണി, ദേവന്‍, ജോണി ആന്റണി, അനൂപ് ചന്ദ്രന്‍, ശാന്തകുമാരി തുടങ്ങിയവര്‍ക്കൊപ്പം സംവിധായകന്‍ ലാല്‍ ജോസ് ചിത്രത്തില്‍ പത്രപ്രവര്‍ത്തകനായി വേഷമിടുന്നു. പുതുമുഖം ബിന്ദ്യയാണ് നായിക. നേപ്പാള്‍, ദുബായ്, ഗോവ, ഡെല്‍ഹി എന്നിവിടങ്ങളിലായിരുന്നു ലൊക്കേഷന്‍. ഒരു ഹിന്ദി പാട്ടും സിനിമയുടെ ഹൈലൈറ്റാവും.