ചെന്നൈ നഗരത്തിന്റെ ആദ്യ ദളിത് വനിത മേയറായി ആര്‍.പ്രിയ

ചെന്നൈ: ഇരുപത്തിയെട്ടുകാരിയായ ആര്‍.പ്രിയ ചെന്നൈ കോര്‍പ്പറേഷന്‍ മേയറാകും. നാളെ നടക്കുന്ന മേയര്‍ തെരഞ്ഞെടുപ്പില്‍ പ്രിയ ഡിഎംകെയുടെ മേയര്‍ സ്ഥാനാര്‍ത്ഥി ആയിരിക്കുമെന്ന് പാര്‍ട്ടി ഔദ്യോഗികമായി അറിയിച്ചു. 333 വര്‍ഷത്തെ ചെന്നൈ കോര്‍പ്പറേഷന്റെ ചരിത്രത്തില്‍ ഇതാദ്യമായാണ് ഒരു ദളിത് വനിത മേയറാകുന്നത്. ചെന്നൈയുടെ മൂന്നാമത്തെ വനിതാ മേയറായിരിക്കും പ്രിയ. താരാ ചെറിയാനും കാമാക്ഷി ജയരാമനുമാണ് ഇതിന് മുമ്പ് മേയര്‍ സ്ഥാനത്ത് എത്തിയ വനിതകള്‍. മം?ഗലപുരത്തെ 74-ാം വാര്‍ഡില്‍ നിന്നാണ് പ്രിയ തെരഞ്ഞെടുക്കപ്പെട്ടത്. 18 വയസ്സ് മുതല്‍ പാര്‍ട്ടി കേഡറാണെങ്കിലും തെരഞ്ഞെടുപ്പ് രാഷ്ട്രീയത്തില്‍ പ്രിയക്ക് ഇത് കന്നിയങ്കമാണ്. തദ്ദേശതെരഞ്ഞെടുപ്പില്‍ ചെന്നൈ കോര്‍പ്പറേഷനില്‍ വിജയിച്ച യുവസ്ഥാനാര്‍ത്ഥികളിലൊരാളാണ് പ്രിയ. ഡിഎംകെ സഖ്യകക്ഷിയായ സിപിഎമ്മിന്റെ സ്ഥാനാര്‍ത്ഥിയായിതേനാപേട്ട 98-ാം വാര്‍ഡില്‍ നിന്നും ജയിച്ച 21 വയസ്സുള്ള പ്രിയദര്‍ശിനിയാണ് പുതിയ കൗണ്‍സിലര്‍മാരിലെ ബേബി. കഴിഞ്ഞ ആഴ്ച നടന്ന തദ്ദേശതെരഞ്ഞെടുപ്പിന് മുന്നോടിയായി ജനുവരിയില്‍ ചെന്നൈ മേയര്‍ സ്ഥാനം പട്ടികജാതി വനിതയ്ക്ക് സംവരണം ചെയ്തു കൊണ്ട് സംസ്ഥാന സര്‍ക്കാര്‍ ഉത്തരവിറക്കിയിരുന്നു. വടക്കന്‍ ചെന്നൈയില്‍ 74-ാം വാര്‍ഡില്‍ നിന്നാണ് ആ.പ്രിയ ഇക്കുറി ഡിഎംകെ സ്ഥാനാര്‍ത്ഥിയായി മത്സരിച്ച് ജയിച്ചത്. ഈ മേഖലയില്‍ നിന്നും മേയര്‍ പദവിയിലേക്ക് എത്തുന്ന ആദ്യ വനിത കൂടിയാണ് അവര്‍. ചെന്നൈ ന?ഗരത്തിന്റെ പകിട്ടുകളില്‍ നിന്നൊഴിഞ്ഞു നില്‍ക്കുന്ന ഒരു മേഖലയാണ് വടചെന്നൈ എന്നറയിപ്പെടുന്ന വടക്കന്‍ ചെന്നൈ. തമിഴ് സിനിമകളില്‍ റൗഡികളുടേയും ?ഗുണ്ടകളുടേയും കോട്ടയായിട്ടാണ് ഈ പ്രദേശത്തെ പതിവായി ചിത്രീകരിക്കാറുള്ളത്. എന്നാല്‍ അടിസ്ഥാന സൗകര്യങ്ങള്‍ പോലുമില്ലാത്ത അനവധി പ്രദേശങ്ങള്‍ വടക്കന്‍ ചെന്നൈയിലുണ്ട്. കുടിവെള്ളലഭ്യത, വൈദ്യുതിക്ഷാമം, ശുചിമുറികളുടെ അഭാവം,മോശം റോഡുകള്‍ തുടങ്ങി അനവധി പ്രശ്‌നങ്ങളാണ് മേഖലയിലെ ജനങ്ങള്‍ നേരിടുന്നത്. ഈ സാഹചര്യത്തില്‍ വടക്കന്‍ ചെന്നൈയില്‍ നിന്നും ഒരു യുവമേയര്‍ വരുന്നത് വലിയ പ്രതീക്ഷയോടെയാണ് ന?ഗരവാസികളും കാണുന്നത്.