പൗരന്മാര്‍ അടിയന്തരമായി റഷ്യ വിടണമെന്ന് യു.എസ്

വാഷിങ്ടണ്‍: തങ്ങളുടെ പൗരന്മാരോട് അടിയന്തരമായി റഷ്യയില്‍ നിന്ന് മടങ്ങണമെന്ന് ആവശ്യപ്പെട്ട് അമേരിക്ക. യുക്രൈനെതിരായ റഷ്യയുടെ ആക്രമണം ശക്തമാവുകയും വ്യോമയാന സൗകര്യങ്ങള്‍ കുറഞ്ഞുവരികയും ചെയ്യുന്ന സാഹചര്യത്തിലാണ് അമേരിക്കയുടെ പുതിയ ആവശ്യം. നിലവില്‍ ലഭ്യമാകുന്ന വിമാനങ്ങളില്‍ എത്രയും പെട്ടെന്ന് അമേരിക്കന്‍ പൗരന്മാര്‍ റഷ്യ വിടണമെന്നാണ് മോസ്‌കോയിലെ യുഎസ് എംബസി അറിയിച്ചത്. യുക്രൈയിനെ റഷ്യന്‍ അധിനിവേശത്തിന് പിന്നാലെ റഷ്യയില്‍ നിന്നുള്ള വിമാനങ്ങളും റഷ്യയിലേക്കുള്ള വിമാനങ്ങളും റദ്ദാക്കുന്നതിന്റെ പശ്ചാത്തലത്തിലാണ് അമേരിക്കന്‍ പൗരന്മാര്‍ക്ക് എംബസി നിര്‍ദേശം നല്‍കിയിരിക്കുന്നത്. വിവിധ രാജ്യങ്ങള്‍ അവരുടെ വ്യോമപാതകള്‍ റഷ്യന്‍ വിമാനങ്ങള്‍ക്ക് മുന്നില്‍ അടച്ചുവെന്നും എത്രയും പെട്ടെന്ന് തന്നെ ലഭിക്കുന്ന വിമാനത്തില്‍ അമേരിക്കന്‍ പൗരന്മാര്‍ റഷ്യ വിടണമെന്നുമാണ് നിര്‍ദേശം. യുദ്ധത്തിന്റെ പശ്ചാത്തലത്തില്‍ യുക്രൈന്‍ അതിര്‍ത്തികളിലേക്കും റഷ്യയിലേക്കും പോകുന്ന അമേരിക്കക്കാര്‍ക്ക് ജാഗ്രതാ നിര്‍ദേശവും നല്‍കിയിട്ടുണ്ട്.