ഇന്ത്യയ്ക്ക് കരുത്തേകാന്‍ 30 യുഎസ് സായുധ പ്രിഡേറ്റര്‍ ഡ്രോണ്‍; ചെലവ് 3 ബില്യന്‍ ഡോളര്‍

വാഷിങ്ടന്‍: യുഎസില്‍നിന്ന് ഇന്ത്യ 30 സായുധ പ്രിഡേറ്റര്‍ ഡ്രോണുകള്‍ (ആളില്ലാ പറക്കും വിമാനം) വാങ്ങുന്നതിനുള്ള ചര്‍ച്ചകള്‍ പുരോഗമിക്കുന്നു. 3 ബില്യന്‍ ഡോളറിന്റെ ഇടപാടാണിതെന്നു വാര്‍ത്താ ഏജന്‍സി പിടിഐ റിപ്പോര്‍ട്ട് ചെയ്തു. കരാര്‍ യാഥാര്‍ഥ്യമായാല്‍, പ്രിഡേറ്റര്‍ ഡ്രോണ്‍ സ്വന്തമാകുന്ന, നാറ്റോ സഖ്യത്തില്‍ അംഗമല്ലാത്ത ആദ്യ രാജ്യമാകും ഇന്ത്യ. 2017ല്‍ പ്രധാനമന്ത്രി നരേന്ദ്ര മോദി വൈറ്റ് ഹൗസില്‍ അന്നത്തെ യുഎസ് പ്രസിഡന്റ് ഡോണള്‍ഡ് ട്രംപുമായി നടത്തിയ കൂടിക്കാഴ്ചയില്‍ സുപ്രധാന പ്രതിരോധ ഇടപാടുകള്‍ പ്രഖ്യാപിച്ചിരുന്നു. തുടര്‍ന്നാണു പ്രിഡേറ്റര്‍ ഡ്രോണുകള്‍ വാങ്ങുന്നതിനെപ്പറ്റിയുള്ള ചര്‍ച്ചകള്‍ ശക്തമായത്. കര, നാവിക, വ്യോമ സേനകള്‍ക്ക് 10 വീതം ഡ്രോണുകള്‍ ലഭ്യമാക്കാനാണ് ഇന്ത്യയുടെ നീക്കം. യുഎസിന്റെ 'മുഖ്യ പ്രതിരോധ പങ്കാളി' എന്ന പദവി ഉപയോഗപ്പെടുത്തി വേഗത്തില്‍ ഡ്രോണുകള്‍ എത്തിക്കാനാണ് ഇരുസര്‍ക്കാരുകളും ശ്രമിക്കുന്നതെന്നു വിവിധ സ്രോതസ്സുകളെ ഉദ്ധരിച്ചു പിടിഐ റിപ്പോര്‍ട്ട് ചെയ്യുന്നു. 'എംക്യു 9ബി സീ ഗാര്‍ഡിയന്‍' വിഭാഗത്തിലുള്ള പ്രിഡേറ്റര്‍ ഡ്രോണുകള്‍ വാങ്ങാനാണു പ്രതിരോധ മന്ത്രാലയത്തിന്റെ തീരുമാനം. ചൈന അതിര്‍ത്തിയില്‍ സംഘര്‍ഷം തുടരുന്ന പശ്ചാത്തലത്തില്‍ ഡ്രോണുകളുടെ വരവ് ഇന്ത്യന്‍ സേനയ്ക്കു കരുത്തു പകരുമെന്നാണു വിലയിരുത്തല്‍.