മോദി സെലന്‍സ്‌കിയെ വിളിച്ചു; വേദന അറിയിച്ച് ഇന്ത്യ, രാഷ്ട്രീയ പിന്തുണ തേടി യുക്രൈന്‍

ദില്ലി: യുക്രൈന്‍ പ്രതിസന്ധിയില്‍ പ്രധാനമന്ത്രി നരേന്ദ്ര മോദി ( വ്‌ളാദിമിര്‍ സെലന്‍സ്‌കിയെ ഫോണില്‍ വിളിച്ച് വേദന അറിയിച്ചെന്ന് ഇന്ത്യ. അക്രമം ഉടന്‍ അവസാനിപ്പിച്ച് ചര്‍ച്ച തുടങ്ങണമെന്നാണ് ഇന്ത്യയുടെ നിലപാടെന്ന് മോദി പറഞ്ഞു. യുക്രൈനിലുള്ള ഇന്ത്യക്കാരുടെ സുരക്ഷ ഉറപ്പാക്കണമെന്നും മോദി യുക്രൈന്‍ പ്രസിഡന്റിനോട് ആവശ്യപ്പെട്ടു. നരേന്ദ്ര മോദിയോട് രാഷ്ട്രീയ പിന്തുണ തേടിയെന്ന് സെലന്‍സ്‌കി ട്വീറ്റ് ചെയ്തിട്ടുണ്ട്. ഒരു ലക്ഷം കടന്നുകയറ്റക്കാര്‍ യുക്രൈനിലുണ്ടന്ന് സെലന്‍സ്‌കി മോദിയെ അറിയിച്ചു. അതിനിടെ, ദില്ലിയിലെ യുക്രൈന്‍ എംബസിക്ക് മുന്നില്‍ ഇന്ത്യയിലുള്ള യുക്രൈനുകാര്‍ എത്തി. മുഴുവന്‍ ഇന്ത്യക്കാരും ഒപ്പം നില്‍ക്കണമെന്ന് യുക്രൈന്‍ പൗരന്‍ ആവശ്യപ്പെട്ടു. ഐക്യദാര്‍ഢ്യം വാക്കുകളില്‍ ഒതുങ്ങരുത്. യുദ്ധം അവസാനിപ്പിക്കാന്‍ ഇന്ത്യയും ആവശ്യപ്പെടണം എന്നും അവര്‍ പറഞ്ഞു. അതേസമയം, യുക്രൈനില്‍ നിന്ന് റൊമേനിയ അതിര്‍ത്തി കടന്ന മലയാളി വിദ്യാര്‍ത്ഥികള്‍ അടക്കമുള്ള സംഘം ഇന്ത്യയിലേക്ക് തിരിച്ചു. 219 പേരുടെ ആദ്യ സംഘം രാത്രി മുംബൈയിലെത്തും. അടുത്ത സംഘം നാളെ പുലര്‍ച്ചയോടെ ദില്ലിയിലെത്തും. ആശങ്കയുടെ തീരത്ത് നിന്ന് ഒടുവില്‍ അവര്‍ ഇന്ത്യന്‍ മണ്ണിലേക്ക് എത്തുകയാണ്. ഇന്ത്യന്‍ സമയം രാവിലെ 9.30 ഓടെയാണ് ആദ്യസംഘം റൊമേനിയ ബുക്കാറെസ്റ്റിലെ വിമാനത്താവളത്തില്‍ എത്തിയത്. ഭക്ഷണവും വെള്ളവും ഇന്ത്യന്‍ എംബസി അധികൃതര്‍ നല്‍കി. റൊമാനിയന്‍ അംബാസഡര്‍ രാഹുല്‍ ശ്രീവാസ്തവ ആദ്യ സംഘത്തെ യാത്രയാക്കി. മുപ്പതിലധികം മലയാളികള്‍ അടങ്ങുന്ന 219 പേരുടെ സംഘമാണ് മുംബൈയിലെത്തുക. രണ്ടാമത്തെ സംഘവും റൊമേനിയന്‍ അതിര്‍ത്തി വഴിയാണ് എത്തുന്നത്. ദില്ലിയിലേക്കാണ് ഇവരെ കൊണ്ടുവരുന്നത്. പതിനേഴ് മലയാളികളാണ് ഈ സംഘത്തിലുള്ളത്. ഇവര്‍ക്കുള്ള താമസം കേരളഹൗസില്‍ ഒരുക്കിയിട്ടുണ്ട്. മലയാളികള്‍ക്കായി സംസ്ഥാന സര്‍ക്കാര്‍ നാട്ടിലേക്ക് സൗജന്യയാത്ര ഏര്‍പ്പെടുത്തും. തിരുവന്തപുരം, കൊച്ചി, കോഴിക്കോട് വിമാനത്താവളങ്ങളിലാകും ഇവരെ എത്തിക്കുക.