യുക്രൈനെ പിന്തുണച്ച് ബ്രിട്ടീഷ് രാജകുടുംബം

റഷ്യയുടെ അധിനിവേശത്തിനെതിരെ ധീരമായി പോരാടുന്ന യുക്രൈനിലെ ജനങ്ങള്‍ക്കൊപ്പം നിലകൊള്ളുന്നതായി ബ്രിട്ടനിലെ വില്യം രാജകുമാരനും പത്‌നി കേറ്റും. രാഷ്ട്രീയ വിഷയങ്ങളില്‍ ബ്രിട്ടീഷ് രാജകുടുംബത്തില്‍ നിന്നുണ്ടാകുന്ന അപൂര്‍വ്വമായ അഭിപ്രായമാണിത്. നിഷ്പക്ഷത പാലിക്കണമെന്ന ഭരണഘടനാ മാനദണ്ഡത്തില്‍ ഉറച്ചുനില്‍ക്കുന്നതിനാല്‍ രാജകുടുംബം അഭിപ്രായം പറയാറില്ല. ''യുക്രൈനിന്റെ ഭാവിയെക്കുറിച്ചുള്ള പ്രതീക്ഷയെയും ശുഭാപ്തിവിശ്വാസത്തെയും കുറിച്ച് പഠിക്കാന്‍, 2020 ഒക്ടോബറില്‍ പ്രസിഡന്റ് സെലെന്‍സ്‌കിയെയും പ്രഥമ വനിതയെയും കാണാനുള്ള ഭാഗ്യം ഞങ്ങള്‍ക്ക് ലഭിച്ചു. ഇന്ന് പ്രസിഡന്റും യുക്രൈന്‍ ജനതയും ആ ഭാവിക്കായി ധീരമായി പോരാടുമ്പോള്‍ ഞങ്ങള്‍ അവര്‍ക്കൊപ്പമാണ്.'' - എലിസബത്ത് രാജ്ഞിയുടെ ചെറുമകന്‍ വില്യമും കേറ്റും ട്വിറ്ററില്‍ കുറിച്ചു. ''ഈ അന്താരാഷ്ട്ര, മാനുഷിക നിയമലംഘനത്തിനെതിരെ'' തങ്ങളും യുക്രൈന്‍ ജനതയ്ക്കൊപ്പം നിലകൊള്ളുന്നു എന്ന് ലോസ് ഏഞ്ചല്‍സിലേക്ക് മാറുന്നതിനായി രാജകീയ ചുമതലകളില്‍ നിന്ന് പടിയിറങ്ങിയ വില്യമിന്റെ ഇളയ സഹോദരന്‍ ഹാരിയും ഭാര്യ മേഗനും വ്യാഴാഴ്ച അവരുടെ വെബ്സൈറ്റില്‍ പറഞ്ഞു. നേരത്തെ 2014ല്‍ റഷ്യന്‍ പ്രസിഡന്റ് വ്ളാഡിമിര്‍ പുടിന്‍ ''ഹിറ്റ്ലറെപ്പോലെ തന്നെയാണ്'' ചെയ്യുന്നതെന്ന ചാള്‍സ് രാജകുമാരന്റെ പരാമര്‍ശം നയതന്ത്രപരമായ തര്‍ക്കത്തിന് കാരണമായിരുന്നു.