വിവാഹ വേദിയില്‍ നിന്ന് നേരെ പോയത് മാതൃരാജ്യത്തിന് വേണ്ടി പടപൊരുതാന്‍; യുക്രൈന്‍ ദമ്പതികളുടെ രാജ്യസ്നേഹത്തിന് മുന്നില്‍ തല കുനിച്ച് ലോകം

യാരീന അരീവയും സ്വിയാതോസ്ലാവ് ഫുര്‍സിനും ആഗ്രഹിച്ച വിവാഹം ഇങ്ങനെയായിരുന്നില്ല. നെയ്പര്‍ നദിക്കരയ്ക്കരുകിലെ വിവാഹ വേദിയില്‍ , തങ്ങള്‍ക്ക് ഏറെ പ്രിയപ്പെട്ടവരുടെ സാമിപ്യത്തില്‍ ലളിതമായ വിവാഹ ചടങ്ങ്. പാട്ടും, നൃത്തവും എല്ലാമായി സന്തോഷം നിറഞ്ഞ കൊച്ചു വിവാഹാഘോഷം. വര്‍ഷങ്ങളായി നെയ്തെടുത്ത ഈ സ്വപ്നം തകര്‍ന്നടിഞ്ഞത് ഒറ്റ രാത്രികൊണ്ടായിരുന്നു. നേരം ഇരുട്ടി വെളുത്തതോടെ തങ്ങളുടെ രാജ്യം യുദ്ധത്തെ അഭിമുഖീകരിക്കുന്നുവെന്ന വാര്‍ത്തയാണ് ഇരുവരേയും തേടിയെത്തിയത്. 2019 ഒക്ടോബറിലാണ് അരീവയും ഫുര്‍സിനും കണ്ടുമുട്ടുന്നത്. അന്ന് മൊട്ടിട്ട പ്രണയമാണ് മൂന്ന് വര്‍ഷങ്ങള്‍ക്ക് ശേഷം ഇന്നലെ വിവാഹത്തില്‍ കലാശിച്ചത്. ആദ്യം മെയ് 6നാണ് ഇരുവരും വിവാഹിതരാകാന്‍ തീരുമാനിച്ചിരുന്നത്. എന്നാല്‍ യുദ്ധം പൊട്ടിപ്പുറപ്പെട്ടതോടെ എത്രയും പെട്ടെന്ന് വിവാഹിതരാകാന്‍ അരീവയും ഫുര്‍സിനും തീരുമാനിക്കുകയായിരുന്നു. യുദ്ധ പശ്ചാത്തലത്തില്‍ ആര്‍ക്ക് എന്ത് സംഭവിക്കും എന്നറിയില്ല. മരണം പടിവാതില്‍ക്കല്‍ നില്‍ക്കുമ്പോള്‍ എത്രയും പെട്ടെന്ന് ഒന്നാവണമെന്ന ചിന്ത ഇരവര്‍ക്കുമിടയില്‍ ഉണ്ടായതില്‍ അത്ഭുതപ്പെടാനില്ല. ഒടുവില്‍ മിസൈലുകളുടേയും യുദ്ധവിമാനങ്ങളുടേയും അകമ്പടിയോടെ അരീവയും ഫുര്‍സിനും സെന്റ് മൈക്കിള്‍സ് മൊണാസ്ട്രിയില്‍ വച്ച് വിവാഹിതരായി. വിവാഹ ശേഷം ഇരുവരും നേരെ പോയത് യുദ്ധം ചെയ്യാനാണ്.'ഞങ്ങള്‍ എപ്പോള്‍ വേണമെങ്കിലും മരണപ്പെടാം. മരിക്കുന്നതിന് മുന്‍പ് ഒരുമിച്ച് ജീവിക്കണമെന്ന് അഗ്രഹമുണ്ടായിരുന്നു. ഇപ്പോള്‍ അതും നടന്നു. ഇനി ഞങ്ങള്‍ പോകുന്നത് യുദ്ധഭൂമിയിലേക്കാണ്. ഞങ്ങളാല്‍ കഴിയുംവിധം യുക്രൈന് വേണ്ടി ഞങ്ങള്‍ പൊരുതും.'- അരീവ പറയുന്നു.