കേംബ്രിഡ്ജ് സര്‍വകലാശാലയിലെ ‘ന്യൂട്ടന്റെ ആപ്പിള്‍’ മരം നിലംപതിച്ചു

ബ്രിട്ടനില്‍ ആഞ്ഞടിച്ച യൂനിസ് കൊടുങ്കാറ്റില്‍ കേംബ്രിഡ്ജ് സര്‍വകലാശാലയിലെ ന്യൂട്ടന്റെ ആപ്പിള്‍ മരം നിലം പതിച്ചു. 1954ല്‍ കേംബ്രിഡ്ജ് സര്‍വകലാശാലയിലെ ബൊട്ടാണിക്കല്‍ ഗാര്‍ഡനില്‍ നട്ട മരം പിന്നീടുള്ള 68 വര്‍ഷക്കാലം കാമ്പസിന്റെ മുഖ്യ ആകര്‍ഷണങ്ങളില്‍ ഒന്നായിരുന്നു. ന്യൂട്ടന്റെ ഗുരുത്വകര്‍ഷണ നിയമം കണ്ടെത്താന്‍ അദ്ദേഹത്തെ സഹായിച്ച ആപ്പിള്‍ മരത്തില്‍ നിന്ന് ക്ലോണ്‍ ചെയ്ത മരമാണ് ഓര്‍മയായത്. അതേ സമയം, നിലം പതിച്ച മരത്തെ ക്ലോണ്‍ ചെയ്ത ശേഷം കാമ്പസില്‍ സ്ഥാപിക്കുമെന്ന് സര്‍വകലാശാല അധികൃതര്‍ വ്യക്തമാക്കി. മണിക്കൂറില്‍ നൂറുമൈലിനു മേല്‍ വേഗതയില്‍ ആഞ്ഞടിച്ച യൂനിസ് കൊടുങ്കാറ്റ് വിതച്ച ദുരിതക്കയത്തില്‍ ആടിയുലയുകയാണ് ബ്രിട്ടന്‍. റെയില്‍ പാളത്തില്‍ മരം വീണതിനെത്തുടന്ന് നഗരത്തിലെ വാട്ടര്‍ലൂ സ്റ്റേഷനിലേക്കുള്ള എല്ലാ സര്‍വീസുകളും നിര്‍ത്തി. അടുത്തകാലത്ത് ബ്രിട്ടന്‍ നേരിട്ട ഏറ്റവും വലിയ കൊടുങ്കാറ്റാണ് യൂനിസ്. കഴിഞ്ഞ നവംബറില്‍ സ്‌കോട്ട്‌ലന്‍ഡിലും നോര്‍ത്ത് ഈസ്റ്റ് ഇംഗ്ലണ്ടിലും കനത്ത നാശം വിതച്ച ആര്‍വെന്‍ കൊടുങ്കാറ്റിന് സമാനമായ സാഹചര്യമാണ് യൂനിസ് മൂലം ഉണ്ടായിരിക്കുന്നത്.