ബജറ്റ് പ്രതീക്ഷ; ടൂറിസം മേഖലയെ പുനരുജ്ജീവിപ്പിക്കാന്‍ പദ്ധതികള്‍ ഉണ്ടാകുമെന്ന് റിപ്പോര്‍ട്ട്

ഈ ബജറ്റില്‍ ടൂറിസം മേഖലയെ പുനരുജ്ജീവിപ്പിക്കാന്‍ പദ്ധതികള്‍ ഉണ്ടാകുമെന്നാണ് റിപ്പോര്‍ട്ട്. തുറമുഖങ്ങള്‍, വിമാനത്താവളങ്ങള്‍, റെയില്‍വേ എന്നിവ കോര്‍ത്തിണക്കി സോണുകള്‍ ആവിഷ്‌കരിക്കും. വ്യോമയാന ഇന്ധനത്തിനുള്ള എക്സൈസ് തീരുവ അഞ്ച് ശതമാനമായി കുറയ്ക്കാനുള്ള സാധ്യതയും ഈ ഘട്ടത്തില്‍ പ്രതീക്ഷിക്കുന്നുണ്ട്. റെയില്‍വേയുടെ നികുതി ഘടനയിലും മാറ്റമുണ്ടായേക്കും. റെയില്‍വേ വഴിയുള്ള ചരക്ക് നീക്കത്തിലും സുപ്രധാന തീരുമാനങ്ങള്‍ ഉണ്ടായേക്കുമെന്നാണ് വിലയിരുത്തല്‍. ഹൈഡ്രജന്‍ ഇന്ധ അധിഷ്ഠിത ട്രെയിനുകള്‍ക്ക് പ്രോത്സാഹനം നല്‍കും. 2030 ഓടെ കാര്‍ബണ്‍ മലിനീകരണം പൂര്‍ണമായും ഒഴിവാക്കാനുള്ള പദ്ധതികള്‍ ഉണ്ടായേക്കും. ഉന്നത വിദ്യാഭ്യാസ മേഖലയ്ക്ക് കൂടുതല്‍ തുക വകയിരുത്താനുള്ള സാധ്യത കാണുന്നുണ്ട്. ഇന്റര്‍നെറ്റ് കണക്ടിവിറ്റഇയും അടിസ്ഥാന സൗകര്യങ്ങളും ഉണ്ടാകും. അതേസമയം, ആരോഗ്യ മേഖലയ്ക്ക് കൂടുതല്‍ കരുതല്‍ ഈ ബജറ്റില്‍ ഉണ്ടാകുമെന്നാണ് സൂചന. വകയിരുപ്പില്‍ 10 മുതല്‍ 15 ശതമാനം വരെ വര്‍ധനയാണ് പ്രതീക്ഷിക്കുന്നത്. ഒഷധ നിര്‍മാണ മേഖലയില്‍ കൂടുതല്‍ സ്റ്റാര്‍ട്ട് അപ്പുകള്‍, മരുന്ന് ഗവേഷണത്തിന് കൂടുതല്‍ പ്രോത്സാഹനം എന്ന സാധ്യതയും മുന്നില്‍ കാണുന്നുണ്ട്. ആരോഗ്യ ഇന്‍ഷുറന്‍സിന്റെ ജിഎസ്ടി അഞ്ച് ശതമാനമായി കുറയ്ക്കാനുള്ള സാധ്യതയുണ്ടെന്നാണ് വിലയിരുത്തല്‍. നിലവില്‍ 18 ശതമാനമാണ് ആരോഗ്യ ഇന്‍ഷുറന്‍സ്. ആധായ നികുതി വകുപ്പിലെ 80 ഡി പ്രകാരമുള്ള ഇളവ് ഒന്നര ലക്ഷമാക്കിയേക്കുമെന്നും സാമ്പത്തിക വിദഗ്ധര്‍ പ്രവചിക്കുന്നു. കൊവിഡ് ബാധിതര്‍ക്കും കുടുംബാംഗങ്ങള്‍ക്കും നികുതി ഇളവുകള്‍ ഉണ്ടായേക്കും. ഇതിന് പുറമെ വാക്സിനേഷന്‍ വേഗത്തിലാക്കാനുള്ള പദ്ധതികളും പ്രഖ്യാപിച്ചേക്കും. രാജ്യം കൊവിഡ് മൂന്നാം തരംഗത്തിലൂടെ കടന്നുപോകുന്നതിനിടെ, സാമ്പത്തിക മേഖല ഉറ്റുനോക്കുന്ന കേന്ദ്രബജറ്റ് ധനമന്ത്രി നിര്‍മല സീതാരാമന്‍ രാവിലെ പതിനൊന്ന് മണിക്ക് അവതരിപ്പിക്കും. ബജറ്റിന് മുന്നോടിയായി സാമ്പത്തിക സര്‍വേ ഇന്നലെ പാര്‍ലമെന്റിന് മുന്നില്‍ വച്ചിരുന്നു. കടമെടുപ്പ് പരിധി ഉയര്‍ത്തണം തുടങ്ങിയ ആവശ്യങ്ങളില്‍ ബജറ്റില്‍ അനുകൂല നിലപാടുണ്ടായാല്‍ കേരളം അടക്കം സംസ്ഥാനങ്ങള്‍ക്ക് ഗുണകരമാകും.