പെണ്‍കുട്ടികളുടെ വസ്ത്രവും സാത്താനും; പള്ളീലച്ചനെ ട്രോളി സോഷ്യല്‍ മീഡിയ

പെണ്‍കുട്ടികളുടെ വസ്ത്രധാരണം എപ്പോഴും ചര്‍ച്ചകള്‍ക്ക് വിധേയമാവുന്ന ഒന്നാണ്. പലപ്പോഴും ഇത്തരം നിലപാടുകള്‍ സ്വീകരിക്കുന്നവര്‍ 'എയറിലാവുകയും' ചെയ്യാറുണ്ട്. ഇത്തരത്തില്‍ പെണ്‍കുട്ടികളുടെ വസ്ത്രത്തെ പരിഹസിക്കുന്ന ഒരു വൈദികന്റെ വീഡിയോ വലിയ തോതില്‍ വിമര്‍ശനങ്ങള്‍ ഏറ്റുവാങ്ങിയിരുന്നു. എന്നാല്‍, ഇതേ പ്രസംഗത്തെ പരിഹസിച്ചുകൊണ്ടുള്ള ഒരു റീലാണ് ഇപ്പോള്‍ സോഷ്യല്‍ മീഡിയയില്‍ വൈറലാവുന്നത്. പെണ്‍കുട്ടികളുടെ വസ്ത്രധാരണമാണ് നാട്ടിലുള്ള പെണ്‍കുട്ടികള്‍ പീഡിപ്പിക്കപ്പെടുന്നതിന് കാരണം എന്നാണ് പ്രബോധന പ്രസംഗം നടത്തുന്ന വൈദികന്റ വാദം. ഏറ്റവും നല്ല വസ്ത്രമായിരുന്ന ചുദിദാറിനെ സാത്താന്‍ കേറി നശിപ്പിച്ചുവൈന്നും പറയുന്നുണ്ട്. ക്രൈസ്തവ വിശ്വാസത്തെയും ബൈബിളിലെ പല വാക്കുകളും ഉദ്ധരിച്ചാണ് ഇക്കാര്യങ്ങള്‍ ആളുകളിലേക്കെത്തിക്കുന്നത്.പ്രസംഗം ഏഴ് വര്‍ഷങ്ങള്‍ മുമ്പുള്ളതാണെങ്കിലും ഇപ്പോള്‍ പുറത്ത് വന്ന റീല്‍ ഇതിനോടകം സോഷ്യല്‍ മീഡിയയില്‍ സജീവ ചര്‍ച്ചയാകുന്നത്. ഒരു പെണ്‍കുട്ടി വൈദികന്റെ വാചകങ്ങളെ പരിഹസിച്ച് അഭിനയിച്ച് തകര്‍ക്കുകയാണ് വീഡിയോയില്‍. പ്രമുഖരുള്‍പ്പെടെ നിരവധി പേര്‍ ഇതിനോടകം വീഡിയോ പങ്കുവയ്ക്കുകയും ചെയ്തിട്ടുണ്ട്.