2021ലെ മികച്ച ഗ്ലോബല്‍ അഡ്വെഞ്ചര്‍ ആക്ഷന്‍ സിനിമകളുടെ പട്ടികയില്‍ ‘മിന്നല്‍ മുരളി’

2021 ഡിസംബര്‍ 24 ന് റിലീസ് ചെയ്ത ടോവിനോ തോമസ് ബേസില്‍ ജോസഫ് കൂട്ടുകെട്ടില്‍ പിറന്ന സൂപ്പര്‍ ഹീറോ ചിത്രമായിരുന്നു 'മിന്നല്‍ മുരളി'. ലോകം ഏറ്റെടുത്ത ചിത്രം ഇപ്പോള്‍ മറ്റൊരു പട്ടികയിലും ഇടം നേടിയിരിക്കുകയാണ്. സോഷ്യല്‍ നെറ്റ്‌വര്‍ക്കിംഗ് സര്‍വ്വീസ് ആയ ലെറ്റര്‍ബോക്‌സ്ഡിന്റെ 2021ലെ ഏറ്റവുമധികം റേറ്റിംഗ് ലഭിച്ച അഡ്വെഞ്ചര്‍ ആക്ഷന്‍ ചലച്ചിത്രങ്ങളുടെ പട്ടികയിലാണ് മിന്നല്‍ മുരളി ഇടം നേടിയിരിക്കുന്നത്. പത്ത് ചിത്രങ്ങളുടെ ലിസ്റ്റില്‍ ഒന്‍പതാം സ്ഥാനത്താണ് ചിത്രം. സ്‌പൈഡര്‍മാന്‍: നോ വേ ഹോം ആണ് ഒന്നാം സ്ഥാനത്ത്. രണ്ടാംസ്ഥാനത്ത് ഡ്യൂണ്‍, മൂന്നാം സ്ഥാനത്ത് തമിഴ് ചിത്രമായ സര്‍പട്ട പരമ്പരൈ, നാല്- ദ് ലാസ്റ്റ് ഡ്യുവല്‍, അഞ്ച്- ദ് ഗ്രീന്‍ നൈറ്റ്, ആറ്- ഷാങ് ചി, ഏഴ്- ഫ്രീക്ക്‌സ് ഔട്ട്, എട്ട്- സുയിസൈഡ് സ്‌ക്വാഡ്, ഒന്‍പത്- മിന്നല്‍ മുരളി, പത്ത്- ഓള്‍ഡ് ഹെന്റി എന്നിങ്ങനെയാണ് പട്ടിക. മിന്നല്‍ മുരളി റിലീസിന് മുന്‍പ് മുതല്‍ പ്രക്ഷകര്‍ക്കിടയില്‍ നിന്ന് മികച്ച പ്രതികരണം ലഭിച്ചിരുന്നു. റിലീസ് ചെയ്ത് തുടര്‍ച്ചയായ മൂന്നാം വാരവും നെറ്റ്ഫ്‌ലിക്‌സിന്റെ ആഗോള പട്ടികയില്‍ മുന്നില്‍ തന്നെയാണ് മലയാളത്തിന്റെ സൂപ്പര്‍ ഹീറോ ചിത്രം. കൂടാതെ ആഗോള തലത്തില്‍ മികച്ച പ്രതികരണവും അഭിനന്ദനങ്ങളും മിന്നല്‍ മുരളിക്ക് ലഭിക്കുന്നുണ്ട്.