‘പലരും ദിലീപിനെക്കുറിച്ച് സംസാരിക്കുന്നത് കരുതലോടെ’; സിനിമ മേഖലയില്‍ നിന്നും പൂര്‍ണ പിന്തുണ അവള്‍ക്കില്ലെന്ന് വിധു വിന്‍സെന്റ്

സിനിമ മേഖലയിലെ സമ്പൂര്‍ണ പിന്തുണ ആക്രമിക്കപ്പെട്ട നടിക്കുണ്ടെന്ന് വിശ്വസിക്കുന്നില്ലെന്ന് സംവിധായിക വിധു വിന്‍സെന്റ്. കേസില്‍ അതിജീവിതക്ക് പിന്തുണയറിയിച്ച് സിനിമ താരങ്ങള്‍ എത്തിയതിന് പിന്നാലെയാണ് വിധുവിന്റെ പ്രതികരണം. കൂടുതല്‍ പേര്‍ സപ്പോര്‍ട്ട് ചെയ്യുന്നു എന്നു പറയുമ്പോഴും ഡബ്ലൂ സി സി സുഹൃത്തുക്കള്‍ തന്നെയാണത്. അല്ലെങ്കില്‍ വിഷയത്തില്‍ നേരത്തെ സംസാരിക്കാന്‍ തയ്യാറായവര്‍ തന്നെയാണ് വീണ്ടും സംസാരിക്കുന്നതെന്നും സംവിധായിക ചൂണ്ടിക്കാട്ടി. അവള്‍ക്കൊപ്പം ഏതാനും സുഹൃത്തുക്കള്‍ നിലനില്‍ക്കുന്നുണ്ടെന്ന് എന്നതുകൊണ്ട് മാത്രമാണ് ഇത് ഇപ്പോഴും ശക്തമായി മുന്നോട്ടുപോകുന്നതെന്നും വിധു റിപ്പോര്‍ട്ടര്‍ ടിവിയോട് പറഞ്ഞു. വിധു വിന്‍സെന്റിന്റെ വാക്കുകള്‍; സിനിമ മേഖലയിലെ സമ്പൂര്‍ണ പിന്തുണ അവള്‍ക്കുണ്ടെന്ന് ഞാന്‍ വിശ്വസിക്കുന്നില്ല. കാരണം ഞാന്‍ ഇപ്പോഴും ഇതിനകത്ത് നിന്ന് ജോലി ചെയ്യുന്ന ആളാണ്. നിരന്തരം നമ്മള്‍ കാണുകയും രാഷ്ട്രീയ പ്രബുദ്ധതയുണ്ടെന്ന് നമ്മള്‍ വിചാരിക്കുന്ന, നീതി ബോധമുണ്ടെന്ന് വിചാരിക്കുന്നവര്‍ പലരും ദിലീപിനെക്കുറിച്ച് കരുതലോടെ സംസാരിക്കുന്നത് നമ്മള്‍ കണ്ടുകൊണ്ടിരിക്കുന്നു. എങ്ങനെയാണ് ഇങ്ങനെയൊരാള്‍ക്ക് ഇത്രയും സംരക്ഷണ വലയത്തില്‍ നിലനില്‍ക്കാന്‍ സാധിക്കുന്നത് എന്നത് എനിക്ക് അത്ഭുതമാണ്. സിനിമ എന്നത് നീതി ന്യായ സമ്പ്രദായങ്ങളുടെ അപ്പുറത്താണ്. പല തരത്തിലുള്ള സംരക്ഷണ കവചത്തിനുള്ളിലാണ് ആ മേഖലയും അതിനുള്ളിലുള്ളവരും എന്നാണ് ഞാന്‍ കാണുന്നത്. കൂടുതല്‍ പേര്‍ സപ്പോര്‍ട്ട് ചെയ്യുന്നു എന്നു പറയുമ്പോളും ആരാണ് സപ്പോര്‍ട്ട് ചെയ്യുന്നത്. ഡബ്ലൂ സിസി സുഹൃത്തുക്കള്‍ തന്നെയാണ്. അല്ലെങ്കില്‍ നേരത്തെ ഈ വിഷയവുമായി ബന്ധപ്പെട്ട് സംസാരിക്കാന്‍ തയ്യാറായവര്‍ തന്നെയാണ്. അവള്‍ക്കൊപ്പം ഏതാനും സുഹൃത്തുക്കള്‍ നിലനില്‍ക്കുന്നുണ്ടെന്ന് എന്നതുകൊണ്ട് മാത്രമാണ് ഇത് ഇപ്പോഴും ശക്തമായി മുന്നോട്ടുപോകുന്നത്. നീതി ബോധത്തെക്കുറിച്ച് അവളുടെ ജാഗ്രത പുലര്‍ത്തിക്കൊണ്ട് അവളുടെ സാന്നിദ്ധ്യം ശക്തമായി തുടരുന്നത് കൊണ്ടാണ് നമ്മള്‍ ഇപ്പോഴും ഇത് ചര്‍ച്ച ചെയ്യുന്നത്. ഒരു ഇമാജിനറി അധികാരത്തിന്റെ ലോകത്താണ് സിനിമയും അതില്‍ പ്രവര്‍ത്തിക്കുന്നവരും ഉള്ളത് അതിന്റെ ബലമാണ് കാണിക്കുന്നത്. നീതി ബോധമുള്ള സര്‍ക്കാര്‍ ഇത്രയും ലാഘവത്തോടെയാണോ ഈ വിഷയത്തെ കാണേണ്ടത് എന്ന വിമര്‍ശനവും ഉന്നയിക്കാന്‍ ഞാന്‍ ആഗ്രഹിക്കുന്നുണ്ട്.