മമ്മൂട്ടി- ലിജോ- എംടി പടത്തില്‍ അഭിനയിക്കണോ? കാസ്റ്റിംഗ് കോളുമായി അണിയറപ്രവര്‍ത്തകര്‍

എംടി വാസുദേവന്‍ നായരുടെ കഥകള്‍ കോര്‍ത്തിണക്കിയുള്ള ആന്തോളജിയില്‍ മമ്മൂട്ടി-ലിജോ ജോസ് പെല്ലിശ്ശേരി ചിത്രം ഉടന്‍ ആരംഭിക്കുമെന്നു വാര്‍ത്ത വലിയ ആവേശത്തോടെയാണ് സോഷ്യല്‍ മീഡിയ ഏറ്റെടുത്തത്. ഇപ്പോഴിതാ സിനിമയിലേക്ക് അഭിനേതാക്കളെ തേടുകയാണ് അണിയറപ്രവത്തകര്‍. ഒമ്പത് മുതല്‍ 17 വയസ്സു വരെ പ്രായമുള്ള ആണ്‍കുട്ടികളെയും 40-70 വയസ്സ് പ്രായമുള്ള സ്ത്രീകളെയും 45-70 വയസ്സ് പ്രായമുള്ള പുരുഷന്മാരെയുമാണ് ആവശ്യം. താല്‍പ്പര്യമുള്ളവര്‍ എഡിറ്റ് ചെയ്യാത്ത ഫോട്ടോയും പെര്‍ഫോമന്‍സ് വീഡിയോയുമടക്കാം അപേക്ഷിക്കുവാനും അണിയറപ്രവര്‍ത്തകര്‍ പറയുന്നു. കുട്ടികള്‍ KIDS4LJPNEXT@GMAIL.COM എന്ന വിലാസത്തിലേക്കും മുതിര്‍ന്നവര്‍ ACTORS4LJPNEXT@GMAIL.COM എന്ന വിലാസത്തിലേക്കുമാണ് അപേക്ഷിക്കേണ്ടത്. നെറ്റിഫ്‌ളിക്സാണ് എംടിയുടെ പത്ത് കഥകളെ ആന്തോളജിയായി ഒരുക്കുന്നത്. 30 മിനിറ്റ് ദൈര്‍ഘ്യമുള്ള 10 ഭാഗങ്ങളായിട്ടാണ് നെറ്റ്ഫ്ലിക്സ് ആന്തോളജി എത്തുക. അവയില്‍ ഷെര്‍ലോക് ഉള്‍പ്പെടെ ഏഴ് ഭാഗങ്ങളാണ് ഇതുവരെ പ്രഖ്യാപിച്ചത്. ഫഹദിന് പുറമെ മോഹന്‍ലാല്‍, മമ്മൂട്ടി, ബിജു മേനോന്‍, ആസിഫ് അലി എന്നിവരും ആന്തോളജിയില്‍ അണിനിരക്കുന്നുണ്ട്. പ്രിയദര്‍ശന്‍, ജയരാജ്, സന്തോഷ് ശിവന്‍, മഹേഷ് നാരായണന്‍ എന്നിവരാണ് മറ്റ് സംവിധായകര്‍. മമ്മൂട്ടിയെ നായകനാക്കി ലിജോ ജോസ് പെല്ലിശ്ശേരി സംവിധാനം ചെയ്യുന്ന മറ്റൊരു ചിത്രം 'നന്‍പകല്‍ നേരത്ത് മയക്കം' അണിയറയില്‍ പുരോഗമിക്കുകയാണ്.രമ്യ പാണ്ഡ്യനാണ് സിനിമയിലെ നായിക കഥാപാത്രത്തെ അവതരിപ്പിക്കുന്നത്. മമ്മൂട്ടിയുടെ ഭാര്യ കഥാപാത്രമായ 'മയില്‍' ആയാണ് രമ്യ സിനിമയില്‍ അഭിനയിക്കുന്നത്. മമ്മൂട്ടി കമ്പനി'യുടെ ബാനറില്‍ മമ്മൂട്ടി തന്നെയാണ് 'നന്‍പകല്‍ നേരത്ത് മയക്കം' എന്ന ചിത്രം നിര്‍മ്മിക്കുന്നത്. ചിത്രം മലയാളത്തിലും തമിഴിലും ആയാണ് ഒരുങ്ങുന്നത്. ലിജോയുടെ കഥയ്ക്ക് എസ് ഹരീഷാണ് തിരക്കഥയും സംഭാഷണവും ഒരുക്കുന്നത്.