‘സ്വതന്ത്രമായി ശ്വസിക്കാന്‍ സാധിക്കുന്നത് കേരളത്തില്‍’; ദൈവത്തിന്റെ സ്വന്തം നാടിന് നന്ദി പറഞ്ഞ് പ്രകാശ് രാജ്

രണ്ട് ഇന്ത്യയില്‍ നിന്നാണു താന്‍ വരുന്നതെന്നും അതില്‍ കേരളം ഉള്‍പ്പെടുന്ന ഇന്ത്യയിലാണ് സ്വതന്ത്രമായി ശ്വസിക്കാന്‍ കഴിയുന്നതെന്നും പ്രകാശ് രാജ്. കേരള ഗസറ്റഡ് ഓഫിസേഴ്‌സ് അസോസിയേഷന്റെ ഡോ.എന്‍.എം. മുഹമ്മദാലിയുടെ പേരിലുള്ള പുരസ്‌കാരം സ്വീകരിച്ച ശേഷം പ്രകാശ് രാജ് പ്രതികരിക്കുകയായിരുന്നു. 'ഞാന്‍ വരുന്നത് രണ്ട് ഇന്ത്യയില്‍ നിന്നാണ് ആദ്യത്തേത് സാന്താക്ലോസ് മൂര്‍ദാബാദ് എന്ന് ആക്രോശിക്കുന്ന വിഡ്ഢികളുടെ ഇന്ത്യ. രണ്ടാമത്തെ ഇന്ത്യ കേരളം ഉള്‍പ്പെടുന്നത്. കേരളം ഉള്‍പ്പെടുന്ന ഇന്ത്യയില്‍ മാത്രമാണ് എനിക്കു സ്വതന്ത്രമായി ശ്വസിക്കാന്‍ കഴിയുന്നത്. ഈ രാക്ഷസന്മാരെ പടിക്കു പുറത്തു നിര്‍ത്തുന്ന ദൈവത്തിന്റെ സ്വന്തം നാടിന് എന്റെ നന്ദി' പ്രകാശ രാജ് പറഞ്ഞു. സിനിമയില്‍ വില്ലനായിട്ടുണ്ടെങ്കിലും ജീവിതത്തില്‍ യഥാര്‍ഥ വില്ലന്മാരെ തുറന്നുകാട്ടുന്ന നായകനാണു പ്രകാശ് രാജെന്നും അദ്ദേഹത്തെ ആദരിക്കുന്നതിലൂടെ ഇന്ത്യന്‍ ഭരണഘടനയെയും അഭിപ്രായ സ്വാതന്ത്ര്യത്തെയും മതനിരപേക്ഷതയെയുമാണ് ആദരിക്കുന്നതെന്ന് സ്പീക്കര്‍ എം.ബി. രാജേഷ് ചടങ്ങ് ഉദഘാടനം ചെയ്തുകൊണ്ട് പറഞ്ഞു. തെന്നിന്ത്യന്‍ താരമായ പ്രകാശ് രാജ് നിരവധി മലയാള സിനിമയുടെയും ഭാഗമായിട്ടുണ്ട്. സിനിമ താരം എന്നതിനപ്പുറം നിരവധി സാമൂഹിക പ്രേശ്‌നങ്ങളില്‍ ഉറച്ച നിലപാടുകള്‍ അറിയിച്ചും പ്രകാശ് രാജ് മുന്‍പും പല തവണ രംഗത്തെത്തിയിട്ടുണ്ട്.