‘മൈ ഡിയര്‍ കുട്ടിച്ചാത്തന്‍’ ‘മിന്നല്‍ മുരളി’ക്ക് പ്രചോദനമായി

ബേസില്‍ ജോസഫ്- ടൊവിനോ തോമസ് ചിത്രം മിന്നല്‍ മുരളിക്ക് വന്‍ സ്വീകാര്യതയാണ് ലഭിക്കുന്നത്. സിനിമയെ ചുറ്റിപ്പറ്റിയുള്ള ചര്‍ച്ചകള്‍ സോഷ്യല്‍ മീഡിയകളില്‍ തുടരുകയാണ്. ഇപ്പോള്‍ ചിത്രത്തെക്കുറിച്ചുള്ള പുതിയ വിശേഷവുമായി എത്തിയിരിക്കുകയാണ് ടൊവിനോ. മിന്നല്‍ മുരളിക്ക് മൈഡിയര്‍ കുട്ടിച്ചാത്തന്‍ എന്ന ആദ്യ മലയാള ത്രി ഡി ചിത്രം പ്രചോദനമായി എന്ന് ടൊവിനോ പറയുന്നു. ബേസിലിന്റെ രസകരമായ ഒരു ഫോട്ടോയും ടൊവിനോ ഫേസ്ബുക്കില്‍ പങ്കുവച്ചിട്ടുണ്ട്. ഒടിടി റിലീസ് ആയി നെറ്റ്ഫ്ലിക്സിന്റെ മറ്റൊരു സിനിമയ്ക്കും ഇല്ലാത്ത വരവേല്‍പ്പായിരുന്നു തുടക്കം മുതലേ 'മിന്നല്‍ മുരളി'ക്ക് ലഭിച്ചുകൊണ്ടിരുന്നത്. 24ന് ഉച്ചയ്ക്ക് 1.30നായിരുന്നു റിലീസ്. ചിത്രത്തിന്റെ ആദ്യ പ്രതികരണങ്ങള്‍ നാലരയോടെ എത്തിത്തുടങ്ങിയിരുന്നു. അടുത്തകാലത്തൊന്നും ഇത്രയും ആകാംഷനിറഞ്ഞതും എന്നാല്‍ റിലീസിന് ശേഷം അതെ ആവേശം തന്നെ നിലനിര്‍ത്തുന്നതുമായ സിനിമ 'മിന്നല്‍ മുരളി' തന്നെയാണ് എന്ന നിരവധി പ്രതികരണങ്ങളും ചിത്രത്തിന്റെ വിജയത്തിന്റെ ഭാഗമാണ്.