‘അച്ഛന്‍ എന്നു മാത്രമേ വിളിച്ചിട്ടുള്ളൂ, വ്യക്തിപരമായ നഷ്ടവും വേദനയും’; ജി കെ പിള്ളയുടെ വിയോഗത്തില്‍ ആശ ശരത്ത്

നടന്‍ ജി കെ പിള്ളയുടെ മരണത്തില്‍ അനുശോചനമറിയിച്ച് സിനിമ-സീരിയല്‍ താരം ആശ ശരത്ത്. കുങ്കുമപ്പൂവ് എന്ന മലയാള സീരിയലില്‍ ഇരുവരും അച്ഛനും മകളുമായി എത്തിയിരുന്നു. താന്‍ അച്ഛന്‍ എന്നു മാത്രമേ വിളിച്ചിട്ടുള്ളൂവെന്നും അദ്ദേഹത്തിന്റെ വേര്‍പാട് വ്യക്തിപരമായ നഷ്ടവും വേദനയുമാണെന്നും ആശ ശരത്ത് ഫേസ്ബുക്കില്‍ കുറിച്ചു. ആശ ശരത്തിന്റെ വാക്കുകള്‍; അച്ഛന്‍ എന്ന് മാത്രമേ ഞാന്‍ വിളച്ചിട്ടുള്ളൂ. തനിക്ക് പിറക്കാതെ പോയ മകള്‍ എന്ന നിലയിലാണ് അദ്ദേഹം എന്നെ സ്നേഹിച്ചത്. കുങ്കുമപ്പൂവിലെ പ്രൊഫസര്‍ ജയന്തിയുടെ അച്ഛന്‍ എനിക്ക് സ്വന്തം അച്ഛന്‍ തന്നെയാണ്. അദ്ദേഹത്തിന്റെ വേര്‍പാട്, അതു കൊണ്ടുതന്നെ എനിക്ക് വ്യക്തിപരമായ നഷ്ടവും വേദനയുമാകുന്നു.പ്രണാമം. ഇന്ന് രാവിലെയാണ് ഗോവിന്ദപിള്ള കേശവപിള്ള എന്ന ജി കെ ശങ്കരപിള്ള അന്തരിച്ചത്. 97 വയസ്സായിരുന്നു. തിരുവനന്തപുരം മെഡിക്കല്‍ കോളേജ് ആശുപത്രിയില്‍ ചികിത്സയിലിരിക്കെയായിരുന്നു അന്ത്യം. ഏകദേശം 325 ലധികം മലയാള സിനിമകളില്‍ അഭിനയിച്ചിട്ടുള്ള അദ്ദേഹം സീരിയല്‍ രംഗത്തും സജീവ സാന്നിദ്ധ്യമായിരുന്നു. 65 വര്‍ഷമായി അഭിനയ രംഗത്ത് സജീവമായിരുന്ന ജി കെ പിള്ള സൈന്യത്തിലും സേവനം അനുഷ്ഠിച്ചിട്ടുണ്ട്. പതിമൂന്ന് വര്‍ഷത്തെ സൈനീക ജീവിതത്തിന് ശേഷമാണ് അദ്ദേഹം ചലച്ചിത്ര രംഗത്തേക്കെത്തിയത്.