ടൊവി സാര്‍ എന്നു വിളിച്ച് രാം ചരണ്‍, നമുക്കും ഒരു സൂപ്പര്‍ ഹീറോയെന്ന് രാജമൗലി; ‘മിന്നല്‍ മുരളി’യെ പ്രശംസിച്ച് ആര്‍ആര്‍ആര്‍ ടീം

മിന്നല്‍ മുരളിയെയും ടൊവിനോ തോമസിനെയും അഭിനന്ദിച്ച് തെന്നിന്ത്യന്‍ സംവിധായകന്‍ രാജമൗലി. എപ്പോഴാണ് നമുക്ക് സ്വന്തമായി ഒരു സൂപ്പര്‍ ഹീറോ ഉണ്ടാവുകയെന്ന് പലരും ചോദിച്ചിരുന്നു. ഇപ്പോള്‍ ടൊവിനോയിലൂടെ നമ്മുക്കും സൂപ്പര്‍ ഹീറോ വന്നിരിക്കുന്നുവെന്ന് രാജമൗലി പറഞ്ഞു. ആര്‍ആര്‍ആറിന്റെ പ്രമോഷന്റെ ഭാഗമായി തിരുവനന്തപുരത്ത് നടന്ന ചടങ്ങില്‍ സംസാരിക്കുകയായിരുന്നു അദ്ദേഹം. ജൂനിയര്‍ എന്‍ടിആറും രാം ചരണും അദ്ദേഹത്തോടൊപ്പം ഉണ്ടായിരുന്നു. ടൊവിനോ തോമസ് പരിപാടിയില്‍ മുഖ്യ അതിഥിയായിരുന്നു. സൂപ്പര്‍ ഹീറോ മിന്നല്‍ മുരളി ഗംഭീരം. അഭിനന്ദനങ്ങള്‍, ഇവിടെ എത്തിയതിന് നന്ദിയെന്ന് രാജമൗലി പറഞ്ഞു. ഇതുവരെയുള്ള തന്റെ ചിത്രങ്ങള്‍ക്ക് കേരളത്തില്‍ നിന്നും ലഭിച്ച പ്രതികരണങ്ങള്‍ ആര്‍ആര്‍ആറിനും പ്രതീക്ഷിക്കുന്നുവെന്നും അദ്ദേഹം കൂട്ടിച്ചേര്‍ത്തു. ടൊവി സര്‍ എന്നു വിളിച്ചാണ് രാം ചരണ്‍ ടൊവിനോയെ സ്വീകരിച്ചത്. ടൊവിനോ എന്നു കേള്‍ക്കുമ്പോള്‍ ജനങ്ങളില്‍ നിന്നും കേള്‍ക്കുന്ന ആരവങ്ങളാണ് നിങ്ങളുടെ അംഗീകാരമെന്നും രാം ചരണ്‍ പറഞ്ഞു. സഹോദരനെപ്പോലെയാണ് ടൊവിനോ തനിക്കെന്ന് ജെഎന്‍ടിആര്‍ പറഞ്ഞു. മിന്നല്‍ മുരളിക്ക് എല്ലാവിധ ആശംസകളും ജൂനിയര്‍ എന്‍ടിആര്‍ നേര്‍ന്നു. വേദിയില്‍ സംസാരിക്കാനെത്തിയ ടൊവിനോയെ ആര്‍പ്പു വിളികളോടെയാണ് പ്രേക്ഷര്‍ സ്വീകരിച്ചത്. ആര്‍ആര്‍ആറിന്റെ ടീസറും ട്രെയ്ലറും കണ്ട ശേഷം സിനിമക്കുവേണ്ടി കാത്തിരിക്കുകയാണെന്നും തീയേറ്ററില്‍ നിന്നു തന്നെ കാണുമെന്നും ടൊവിനോ പറഞ്ഞു. ആര്‍ആര്‍അര്‍ വലിയ വിജയമായിരിക്കട്ടെ. സിനിമ തീയേറ്ററില്‍ റിലീസ് ചെയ്യുമ്പോള്‍ ആദ്യ ദിവസംതന്നെ കാണുന്നവരില്‍ ഒരാളായിരിക്കും താന്‍ എന്നും താരംകൂട്ടിച്ചേര്‍ത്തു.