‘ഓപ്പറേഷന്‍ ജാവ’ ഐഎംഡിബിയില്‍ നാലാമത്; ഈ സന്തോഷം രണ്ടാം ഭാഗത്തിലേക്ക് അടുപ്പിക്കുന്നുവെന്ന് തരുണ്‍ മൂര്‍ത്തി

ഓപ്പറേഷന്‍ ജാവക്ക് രണ്ടാം ഭാഗത്തിന്റെ സാധ്യതയെ സ്ഥിരീകരിച്ച് സംവിധായകന്‍ തരുണ്‍ മൂര്‍ത്തി. ചിത്രം ഐഎംഡിബി പട്ടികയില്‍ നാലാമത് എത്തിയ സന്തോഷം പങ്കുവച്ചാണ് തരുണ്‍ ഇക്കാര്യം അറിയിച്ചത്. 'ഈ സന്തോഷം ഞങ്ങളെ രണ്ടാം ഭാഗത്തിലേക്ക് അടുപ്പിക്കുന്നു' എന്ന് തരുണ്‍ മൂര്‍ത്തി ഫേസ്ബുക്കില്‍ കുറിച്ചു. 8.2 റേറ്റിംഗോടെയാണ് ഐഎംഡിബിയില്‍ ത്രില്ലര്‍ സിനിമകളുടെ ലിസ്റ്റില്‍ ഓപ്പറേഷന്‍ ജാവ നാലാമത് എത്തിയത്. നേരത്തെ ചിത്രത്തിന്റെ രണ്ടാ ഭാഗത്തിന്റെ സാധ്യതയെക്കുറിച്ച് തരുണ്‍ മൂര്‍ത്തി പറഞ്ഞിരുന്നു. വെറുതയല്ല തുടരും എന്ന് എഴുതികാണിച്ചത്. അതിനുള്ള സാധ്യതകള്‍ മുന്നില്‍ കണ്ടാണ്. ഓരോ കാലഘട്ടത്തിലും പുതിയ ക്രൈമുകള്‍ ഉണ്ടാവും. അപ്പോള്‍ അതിനായി പുതിയ ഓപ്പറേഷനുകളും വേണ്ടിവരും. അങ്ങനെ സംഭവിക്കുമ്പോള്‍ ജാവ ടീം വീണ്ടും വരുമെന്ന് തരുണ്‍ മൂര്‍ത്തി വ്യക്തമാക്കിയിരുന്നു. 2021 ഫെബ്രുവരി 12നാണ് ചിത്രം തീയേറ്ററുകളില്‍ എത്തിയത്. കേരളത്തിലും തമിഴ്നാട്ടിലും നടന്ന സുപ്രധാന സൈബര്‍ കേസുകളെയും അടിസ്ഥാനമാക്കിയാണ് ഓപ്പറേഷന്‍ ജാവ ഒരുങ്ങിയത്. ഒരു വര്‍ഷത്തോളം നീണ്ട റിസേര്‍ച്ചുകള്‍ക്കൊടുവിലാണ് തരുണ്‍ മൂര്‍ത്തി ചിത്രത്തിന്റെ തിരക്കഥ പൂര്‍ത്തിയാക്കിയത്. കേരള പോലീസിന്റെ കുറ്റാന്വേഷണ രീതികളും കുറ്റവാളികളെ ഫ്രെയിം ചെയ്യുന്ന നടപടികളും സത്യസന്ധമായി സിനിമയില്‍ ആവിഷ്‌കരിച്ചിരുന്നു.