‘നമ്മുടെ രാഷ്ട്രപതി കരുതലുള്ളയാളാണ്; വെയിലത്തു നിന്ന നമ്മളെ പരിഗണിച്ചല്ലോ’

സമയം ഇന്നലെ ഉച്ചകഴിഞ്ഞ് 3.23. ബേക്കലില്‍നിന്നു പെരിയ കേന്ദ്ര സര്‍വകലാശാലയിലേക്കുള്ള രാഷ്ട്രപതിയുടെ വാഹനവ്യൂഹം ചട്ടഞ്ചാല്‍ റോഡിലേക്കു കടന്നു പോകാന്‍ കാഞ്ഞങ്ങാട്-കാസര്‍കോട് സംസ്ഥാനപാത ബ്ലോക്ക് ചെയ്തിരുന്നു. വെയിലില്‍ കാത്തുനിന്ന് യാത്രക്കാരും കുറച്ചു വലഞ്ഞിരുന്നു. എന്നാല്‍ കളനാട്-ചട്ടഞ്ചാല്‍ റോഡിലേക്കു കയറിയ വാഹനവ്യൂഹം പെട്ടെന്നു നിര്‍ത്തി. എന്തെങ്കിലും പ്രശ്‌നമുണ്ടായോ എന്ന ആശങ്ക. അകലെ നിന്ന യാത്രക്കാര്‍ക്കും പൊലീസുകാര്‍ക്കും കാര്യം മനസ്സിലായില്ല. സുരക്ഷാ ജീവനക്കാരന്‍ പുറത്തിറങ്ങി രാഷ്ട്രപതിയുടെ വാഹനത്തിന്റെ വാതില്‍ തുറന്നു. രാഷ്ട്രപതി റാം നാഥ് കോവിന്ദ് പുറത്തിറങ്ങി. വഴിയരികില്‍ സുരക്ഷാ വേലിക്കപ്പുറം കാത്തുനിന്ന നാട്ടുകാരെയും യാത്രക്കാരെയും പുഞ്ചിരിയോടെ കയ്യുയര്‍ത്തി അഭിവാദ്യം ചെയ്തു. ആളുകള്‍ ആഹ്ലാദത്താല്‍ ആര്‍പ്പു വിളിച്ചു. സമീപത്തെ കെട്ടിടങ്ങളുടെ മുകളില്‍വരെ ആളുകള്‍ നിരന്നിരുന്നു. വാഹനവ്യൂഹം കാണാന്‍ കാത്തിരുന്നവര്‍ക്ക് വലിയ ആഹ്ലാദമായി രാഷ്ട്രപതിയുടെ അഭിവാദ്യം. രാഷ്ട്രപതി കടന്നുപോകുമെന്ന് അറിയാമെങ്കിലും ഇറങ്ങുമെന്ന് ആരും വിചാരിച്ചില്ല. 'നമ്മുടെ രാഷ്ട്രപതി കരുതലുള്ളയാളാണ്. വെയിലത്തു നിന്ന നമ്മളെ ഒന്നു പരിഗണിച്ചല്ലോ', കണ്ടു നിന്ന ഒരാളുടെ കമന്റ് ഇങ്ങനെയായിരുന്നു. എല്ലാ ഭാഗത്തും കാത്തു നിന്നവരെ അഭിവാദ്യം ചെയ്ത ശേഷം ഉടന്‍ തന്നെ രാഷ്ട്രപതി ബിരുദദാന ചടങ്ങിലേക്കു യാത്ര തിരിച്ചു.