അനുമതിയില്ലാതെ പാര്‍ട്ടിക്ക് പുറത്ത് കൂട്ടായ്മ; ഐഎന്‍എല്ലില്‍ വഖഫ് വിവാദം

കോഴിക്കോട് വഖഫ് വിഷയത്തില്‍ ഇന്ത്യന്‍ നാഷനല്‍ ലീഗില്‍ (ഐഎന്‍എല്‍) വിവാദം. സംസ്ഥാന പ്രസിഡന്റ് എ.പി. അബ്ദുല്‍ വഹാബ്, പഴയ നാഷനല്‍ സെക്യുലര്‍ കോണ്‍ഫറന്‍സ് നേതാവും ഇടതു സ്വതന്ത്ര എംഎല്‍എയുമായ പി.ടി.എ.റഹീമുമായി ചേര്‍ന്ന് വഖഫ് ആക്ഷന്‍ കൗണ്‍സില്‍ രൂപീകരിച്ചതാണ് ഔദ്യോഗിക പക്ഷത്തെ ചൊടിപ്പിച്ചത്. പാര്‍ട്ടിയുടെ അനുമതിയില്ലാതെ പാര്‍ട്ടിക്കു പുറത്ത് കൂട്ടായ്മ രൂപീകരിച്ചത് ശരിയല്ലെന്ന് ജനറല്‍ സെക്രട്ടറി കാസിം ഇരിക്കൂര്‍ പറഞ്ഞു. അന്യാധീനപ്പെട്ട വഖഫ് സ്വത്തുക്കള്‍ തിരിച്ചുപിടിക്കണമെന്ന് ആവശ്യപ്പെട്ടാണ് അബ്ദുല്‍ വഹാബ് സെക്രട്ടറിയായി ആക്ഷന്‍ കൗണ്‍സില്‍ രൂപീകരിച്ചത്. പി.ടി.എ.റഹീമാണ് ചെയര്‍മാന്‍. വഹാബ് പക്ഷത്തെ എന്‍.കെ.അസീസും ആക്ഷന്‍ കൗണ്‍സിലില്‍ അംഗമാണ്. അടുത്തയാഴ്ച, കോഴിക്കോട് കൂടുതല്‍ ആളുകളെ ഉള്‍പ്പെടുത്തി യോഗം വിളിക്കാനിരിക്കെ, ഔദ്യോഗിക പക്ഷത്തിനെതിരെയുള്ള കുറുമുന്നണിയായാണ് ഐഎന്‍എല്‍ ഔദ്യോഗിക പക്ഷം ഇതിനെ വിലയിരുത്തുന്നത്. വഖഫ് വിഷയം പാര്‍ട്ടി ക്യാംപെയ്‌നായി ഏറ്റെടുത്തിരിക്കെ പ്രസിഡന്റ് അതേ വിഷയത്തില്‍ മറ്റൊരു കൂട്ടായ്മയ്ക്ക് നേതൃത്വം നല്‍കുന്നത് നീതികരിക്കാനാകില്ലെന്നാണ് ഔദ്യോഗിക പക്ഷത്തിന്റെ നിലപാട്. എന്നാല്‍, വഖഫുമായി ബന്ധപ്പെട്ട സര്‍ക്കാര്‍ നയം ജനങ്ങളില്‍ എത്തിക്കാനുള്ള ഒരു സംവിധാനം മാത്രമാണിതെന്നാണ് പി.ടി.എ.റഹീമിന്റ വിശദീകരണം. വഖഫ് സ്വത്ത് സംരക്ഷിക്കണമെന്ന് ആവശ്യപ്പെട്ട് വര്‍ഷങ്ങളായി പ്രവര്‍ത്തിക്കുന്നവരുടെ കൂട്ടായ്മയാണിതെന്നും ഐഎന്‍എല്ലുമായി അതിനെ കൂട്ടിച്ചേര്‍ക്കേണ്ടതില്ലെന്നും അബ്ദുല്‍ വഹാബും പറയുന്നു.