ഒരാഴ്ചയ്ക്കിടെ 3ല്‍നിന്ന് 73 ശതമാനത്തിലേക്ക്; ആദ്യം മരിച്ചത് വാക്സീന്‍ എടുക്കാത്തയാള്‍

യുഎസില്‍ ഒമിക്രോണ്‍ കേസുകളുടെ അതിവേഗ വര്‍ധന. ഈ ആഴ്ച റിപ്പോര്‍ട്ട് ചെയ്ത കേസുകളില്‍ 73 ശതമാനവും ഒമിക്രോണ്‍ വകഭേദമാണ്. യുഎസില്‍നിന്നുള്ള കണക്കു പ്രകാരം കഴിഞ്ഞ ആഴ്ച ഇതു വെറും മൂന്ന് ശതമാനമായിരുന്നു. അതിവ്യാപന ശേഷിയുള്ള കൊറോണ വൈറസ് വകഭേദം രാജ്യത്തു സ്ഥിരീകരിച്ചതായി സെന്റര്‍ ഫോര്‍ ഡിസീസ് കണ്‍ട്രോള്‍ ആന്‍ഡ് പ്രിവന്‍ഷന്‍ പ്രതികരിച്ചു. കഴിഞ്ഞ ആഴ്ചവരെ വ്യാപനത്തില്‍ മുന്നില്‍നിന്നിരുന്ന ഡെല്‍റ്റ വകഭേദത്തിന്റെ വ്യാപന തോത് ഇപ്പോള്‍ 27 ശതമാനമാണ്. ഒമിക്രോണ്‍ കാരണം വീണ്ടും അതിവേഗ വ്യാപനമുണ്ടാകുമോയെന്ന ആശങ്കയിലാണു രാജ്യം. ഒമിക്രോണ്‍, രോഗികളെ ഡെല്‍റ്റയെക്കാള്‍ ഗുരുതരമായ അവസ്ഥയിലെത്തിക്കുമെന്നതിന് ഇതുവരെ തെളിവുകളില്ല. എന്നാല്‍ രോഗികളുടെ എണ്ണം ക്രമാതീതമായി വര്‍ധിച്ചാല്‍ ആശുപത്രികളില്‍ ഇടമില്ലാതാകും. ഒമിക്രോണ്‍ രോഗികളുടെ എണ്ണത്തിലെ വര്‍ധന പ്രതീക്ഷിച്ചതാണെന്നും ലോകത്താകമാനം സമാനമായ സാഹചര്യങ്ങള്‍ റിപ്പോര്‍ട്ട് ചെയുന്നുണ്ടെന്നും സെന്റര്‍ ഫോര്‍ ഡിസീസ് കണ്‍ട്രോള്‍ ആന്‍ഡ് പ്രിവന്‍ഷന്‍ പ്രതികരിച്ചു. യുഎസിലെ ചില പ്രദേശങ്ങളില്‍ പുതുതായി റിപ്പോര്‍ട്ട് ചെയ്യുന്ന കേസുകളെല്ലാം ഒമിക്രോണ്‍ ആണ്. ന്യൂയോര്‍ക്കിലും ന്യൂജഴ്‌സിയിലും 92 ശതമാനമാണ് ഒമിക്രോണിന്റെ വര്‍ധന. വാഷിങ്ടനില്‍ 96 ശതമാനം. ഒമിക്രോണിനെതിരെ ബൂസ്റ്റര്‍ ഡോസ് വാക്‌സീന്‍ സ്വീകരിക്കണമെന്ന് യുഎസ് ജനങ്ങളോട് ആവശ്യപ്പെട്ടു. ഒമിക്രോണ്‍ ബാധിച്ച് യുഎസിലെ ആദ്യ മരണം ടെക്‌സസില്‍ റിപ്പോര്‍ട്ട് ചെയ്തു. വാക്‌സീന്‍ എടുത്തിട്ടില്ലാത്ത മധ്യവയസ്‌കനാണു മരിച്ചത്. തിങ്കളാഴ്ചയാണ് ഇയാള്‍ മരിച്ചതെന്ന് ഹാരിസ് കൗണ്ടി ആരോഗ്യ വിഭാഗം അറിയിച്ചു.