പാനമ പേപ്പര്‍: ഐശ്വര്യയെ ഇഡി ചോദ്യം ചെയ്തത് 5 മണിക്കൂറിലേറെ; വിട്ടയച്ചു

വ്യക്തികളുടെയും സ്ഥാപനങ്ങളുടെയും അനധികൃത രഹസ്യ നിക്ഷേപത്തിന്റെ വിവരങ്ങളടങ്ങിയ പാനമ പേപ്പര്‍ വെളിപ്പെടുത്തലുമായി ബന്ധപ്പെട്ട് ബോളിവുഡ് താരം ഐശ്വര്യ റായിയെ എന്‍ഫോഴ്‌സ്‌മെന്റ് ഡയറക്ടറേറ്റ് (ഇഡി) ചോദ്യം ചെയ്തുവിട്ടയച്ചു. അഞ്ചു മണിക്കൂറിലേറെ നീണ്ട ചോദ്യം ചെയ്യലിനു ശേഷം തിങ്കളാഴ്ച രാത്രിയോടെയാണ് ഐശ്വര്യ ഓഫിസ് വിട്ടത്.കൂടുതല്‍ ചോദ്യം ചെയ്യുന്നതിനായി നടിയെ ഇനി വിളിച്ചുവരുത്തുമോയെന്ന കാര്യത്തില്‍ അവ്യക്തതയുണ്ട്. വിദേശനാണ്യ വിനിമയ ചട്ടം (ഫെറ) ലംഘിച്ച കേസില്‍ ചോദ്യം ചെയ്യലിന് ഹാജരാകാനാണ് നോട്ടിസ് നല്‍കിയത്. പാനമ രേഖകളെ കുറിച്ച് അന്വേഷണം നടത്തുന്ന പ്രത്യേക അന്വേഷണ സംഘമാണ് നോട്ടിസ് അയച്ചത്. നേരത്തേ രണ്ടു തവണ വിളിപ്പിച്ചെങ്കിലും ഐശ്വര്യ ഹാജരായിരുന്നില്ല. ബ്രിട്ടിഷ് വെര്‍ജിന്‍ ഐലന്‍ഡിലെ കമ്പനിയില്‍ നടി പണം നിക്ഷേപിച്ചിട്ടുണ്ടെന്ന കാര്യം അന്വേഷണ ഏജന്‍സി ചോദിച്ചറിഞ്ഞെന്നാണു വിവരം. 2017ലാണ് ആരോപണത്തിന്‍മേല്‍ ഇഡി അന്വേഷണം തുടങ്ങിയത്. കഴിഞ്ഞ 15 വര്‍ഷത്തിനിടെ നടത്തിയ എല്ലാ വിദേശ പണമിടപാടുകളുടെയും രേഖകള്‍ ഐശ്വര്യ ഇഡിക്കു സമര്‍പ്പിച്ചിട്ടുണ്ടെന്നാണു വിവരം.