ഓട്ടോ അപകടത്തില്‍ മരണം നാലായി; ചികിത്സയിലായിരുന്ന ഡ്രൈവര്‍ മരിച്ചു

മലപ്പുറം: മലപ്പുറത്തെ വാഹനാപകടത്തില്‍ മരണം നാലായി. അപകടത്തില്‍ പെട്ട ഓട്ടോറിക്ഷയുടെ ഡ്രൈവര്‍ അസന്‍ കുട്ടി മരിച്ചു. കോഴിക്കോട് മെഡിക്കല്‍ കോളേജില്‍ ചികിത്സയിലിരിക്കെയാണ് മരണം. ഓട്ടോയിലുണ്ടായിരുന്ന മൂന്ന് പേര്‍ അപകട സ്ഥലത്ത് വച്ച് തന്നെ മരിച്ചിരുന്നു. ഒരേ കുടുംബത്തിലെ അംഗങ്ങളാണ് മരിച്ച മറ്റ് മൂന്ന് പേരും. ആനക്കയം ചേപ്പൂര്‍ കൂരിമണ്ണില്‍ പൂവത്തിക്കല്‍ ഖൈറുന്നീസ (46 ), സഹോദരന്‍ ഉസ്മാന്‍ (36), ഭാര്യ സുലൈഖ (33) എന്നിവരാണ് മരിച്ചത്. ഓട്ടോയിലുണ്ടായിരുന്ന നാല് കുട്ടികള്‍ പരിക്കേറ്റ് ചികിത്സിയിലാണ്. മലപ്പുറം ആനക്കയം വള്ളിക്കാപ്പറ്റയിലാണ് അപകടമുണ്ടായത്. ഉച്ചയ്ക്ക് 1:30 ഓടെയായിരുന്നു സംഭവം. ഖൈറുന്നിസയുടെ മറ്റൊരു സഹോദരന്റെ വീട്ടിലെ സല്‍ക്കാര ചടങ്ങില്‍ പങ്കെടുക്കാനെത്തിയതായിരുന്നു കുടുംബം. 40 അടി താഴ്ചയിലേക്കാണ് ഓട്ടോ മറിഞ്ഞത്. അപകടത്തില്‍ ഓട്ടോ തകര്‍ന്നു. ഖൈറുന്നീസയുടെ മക്കളായ അഫ്‌നാസ് (9), അബിന്‍ഷാന്‍ (7), ഉസ്മാന്റെ മക്കളായ നിഷാദ് (11), നിഷാല്‍ (8) എന്നിവര്‍ അപകടത്തില്‍ പരിക്കേറ്റ് ചികിത്സയിലാണ്. ഇവരെ കോഴിക്കോട് മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചിരിക്കുകയാണ്.