നിവിന്‍ പോളി നായകനാകുന്ന രാജീവ് രവി ചിത്രം ‘തുറമുഖം’; പുതുവര്‍ഷത്തില്‍ തീയറ്ററുകളിലേക്ക്

നിവിന്‍ പോളി നായകനായി രാജീവ് രവി ഒരുക്കുന്ന ചിത്രം 'തുറമുഖം' 2022 ജനുവരി 20ന് തീയറ്ററുകളില്‍ പ്രദര്‍ശനത്തിനെത്തും. 1962 വരെ കൊച്ചിയില്‍ നിലനിന്നിരുന്ന തൊഴില്‍ വിഭജന സമ്പ്രദായവും, ഇത് അവസാനിപ്പിക്കാന്‍ തൊഴിലാളികള്‍ നടത്തിയ സമരവുമാണ് ചിത്രത്തിന്റെ പ്രമേയം. ഇന്ദ്രജിത്ത് സുകുമാരന്‍, ജോജു ജോര്‍ജ്, നിമിഷ സജയന്‍, സുദേവ് നായര്‍, മണികണ്ഠന്‍ ആചാരി, പൂര്‍ണിമ ഇന്ദ്രജിത്, ദര്‍ശന രാജേന്ദ്രന്‍, അര്‍ജുന്‍ അശോകന്‍ തുടങ്ങിയ വലിയ താരനിര തന്നെ ചിത്രത്തിലുണ്ട്. 'ജനങ്ങളുടെ ശബ്ദം നിശബ്ദമാക്കാനാവില്ല! കലാപം ആരംഭിക്കാന്‍ പോകുകയാണ്. തുറമുഖം, 2022 ജനുവരി 20-ന് നിങ്ങളുടെ അടുത്തേക്ക് എടുത്തുന്നു' എന്നായിരുന്നു നിവിന്‍ പോളി സോഷ്യല്‍ മീഡിയയില്‍ ചിത്രത്തിന്റെ വരവറിയിച്ചു കൊണ്ട് കുറിച്ചത്. ഈ കലുഷിതമായ കാലഘട്ടത്തിലൂടെ കടന്നുപോകുന്ന ഒരു കുടുബത്തിന്റെയും ഒരു നാടിന്റെയും അതിജീവനത്തിന്റെ കഥയാണ് തുറമുഖം. നന്മക്കും തിന്മക്കും ഇടയില്‍, ദുരന്തത്തിനും വീരോചിതമായ ചെറുത്തുനില്‍പിനും ഇടയില്‍, പ്രത്യാശക്കും നിരാശക്കും ഇടയില്‍ ഉലയുന്ന രണ്ടു തലമുറകളുടെ കഥ. തെക്കേപ്പാട്ട് ഫിലിംസിന്റെ ബാനറില്‍ സുകുമാര്‍ തെക്കേപ്പാട്ട് ആണ് ചിത്രം നിമ്മിചിരിക്കുന്നത്. ബി അജിത്കുമാര്‍ എഡിറ്റിംഗും ഗോകുല്‍ദാസ് കലാസംവിധാനവും നിര്‍വ്വഹിച്ചിരിക്കുന്നത്.