‘തീവയ്ക്കും മുന്‍പ് കുത്തിപ്പരുക്കേല്‍പ്പിച്ചു’: കൃഷ്ണപ്രിയയുടെ മരണമൊഴി പുറത്ത്

തിക്കോടി പഞ്ചായത്ത് ഓഫിസിലെ താല്‍ക്കാലിക ജീവനക്കാരിയായ യുവതിയെ ഓഫിസിനു മുന്‍പില്‍ പെട്രോളൊഴിച്ചു തീകൊളുത്തി കൊലപ്പെടുത്തിയ സംഭവത്തില്‍ യുവതിയുടെ മരണമൊഴി പുറത്ത്. തീവയ്ക്കും മുന്‍പ് യുവാവ് കുത്തിപ്പരുക്കേല്‍പ്പിച്ചതായാണ് യുവതിയുടെ മരണമൊഴി. സ്വയം തീകൊളുത്തിയ യുവാവും മരിച്ചിരുന്നു. തിക്കോടി കാട്ടുവയല്‍ മനോജന്റെ മകള്‍ കൃഷ്ണപ്രിയ (23), തിക്കോടി വലിയമഠത്തില്‍ മോഹനന്റെ മകന്‍ നന്ദകുമാര്‍ (30) എന്നിവരാണ് മരിച്ചത്. 90 ശതമാനത്തോളം പൊള്ളലേറ്റ നിലയിലാണു കൃഷ്ണപ്രിയയെ ആശുപത്രിയിലെത്തിച്ചതെങ്കിലും ബോധം പൂര്‍ണമായി നഷ്ടപ്പെട്ടിട്ടില്ലാത്തതിനാല്‍ സംസാരിക്കുന്നുണ്ടായിരുന്നു. തീകൊളുത്തും മുന്‍പ് നന്ദു (നന്ദകുമാര്‍) തന്നെ കുത്തിപ്പരുക്കേല്‍പിച്ചതായി ആശുപത്രിയില്‍ വച്ചാണു കൃഷ്ണപ്രിയ മൊഴി നല്‍കിയത്. വെള്ളിയാഴ്ച രാവിലെ 10 മണിയോടെ കൃഷ്ണപ്രിയ ജോലിക്കു വരുന്ന വഴി പഞ്ചായത്ത് ഓഫിസിനു മുന്‍പിലെ റോഡരികില്‍ നന്ദകുമാറുമായി വാക്കുതര്‍ക്കമുണ്ടായി. തര്‍ക്കത്തിനിടെ നന്ദകുമാര്‍ കയ്യിലുണ്ടായിരുന്ന ബോട്ടിലിലെ പെട്രോള്‍ കൃഷ്ണപ്രിയയുടെ ദേഹത്തും തുടര്‍ന്ന് സ്വന്തം ദേഹത്തും ഒഴിച്ച് ലൈറ്റര്‍ ഉപയോഗിച്ച് തീ കൊളുത്തുകയായിരുന്നു. ഓടിക്കൂടിയ നാട്ടുകാരും പൊലീസും ചേര്‍ന്ന് ഇരുവരെയും കൊയിലാണ്ടി താലൂക്ക് ആശുപത്രിയിലും തുടര്‍ന്ന് കോഴിക്കോട് മെഡിക്കല്‍ കോളജിലും എത്തിച്ചെങ്കിലും വൈകിട്ട് നാലു മണിയോടെ കൃഷ്ണപ്രിയ മരിച്ചു. ശനിയാഴ്ച പുലര്‍ച്ചെ രണ്ടുമണിയോടെയാണ് നന്ദകുമാര്‍ മരിച്ചത്. കൃഷ്ണപ്രിയയും നന്ദകുമാറും നാലു വര്‍ഷത്തിലേറെയായി സൗഹൃദത്തിലായിരുന്നുവെങ്കിലും ഏതാനും ദിവസം മുന്‍പ് തെറ്റിയിരുന്നു. പ്രണയനൈരാശ്യമാണ് ആക്രമണത്തിന് പിന്നിലെന്നാണ് പൊലീസിന്റെ പ്രാഥമിക നിഗമനം. തിക്കോടി പഞ്ചായത്ത് ഓഫിസിലെ പ്ലാനിങ് വിഭാഗത്തില്‍ പ്രോജക്ട് അസിസ്റ്റന്റ് ഒഴിവില്‍ താല്‍ക്കാലിക ജീവനക്കാരിയായി അഞ്ചു ദിവസം മുന്‍പാണു കൃഷ്ണപ്രിയ ജോലിക്കു ചേര്‍ന്നത്.