കടുവയെ തിരയാന്‍ കുങ്കി ആനകളും ഡ്രോണും; കുട്ടികള്‍ക്ക് സ്‌കൂളില്‍ പോകാന്‍ സുരക്ഷ

വയനാട് കുറുക്കന്‍മൂലയില്‍ കടുവയ്ക്കായുള്ള തിരച്ചിലിന് കുങ്കി ആനകളും. മുത്തങ്ങ വന്യജീവി സങ്കേതത്തില്‍ പ്രത്യേക പരിശീലനം നേടിയ രണ്ട് കുങ്കി ആനകള്‍ കുറുക്കന്‍മൂലയിലേക്ക് തിരിച്ചു. ഡ്രോണുകള്‍ ഉപയോഗിച്ചും നിരീക്ഷണം ശക്തമാക്കും. അതേസമയം, കുറുക്കന്‍മൂലയിലെ വിദ്യാര്‍ഥികള്‍ക്ക് സ്‌കൂളില്‍ പോകാന്‍ പൊലീസ് സംരക്ഷണമൊരുക്കും. പാല്‍-പത്ര വിതരണത്തിനും സുരക്ഷയൊരുക്കും. രാത്രി സമയത്ത് ജനങ്ങള്‍ പുറത്തിറങ്ങരുതെന്നു കര്‍ശന നിര്‍ദേശം നല്‍കിയതായി സബ് കലക്ടര്‍ ആര്‍.ശ്രീലക്ഷ്മി അറിയിച്ചു. ഈ പ്രദേശത്ത് രാത്രി കാലങ്ങളില്‍ വൈദ്യുതി മുടങ്ങരുതെന്നു കെഎസ്ഇബിക്കും നിര്‍ദേശം നല്‍കി. ഇന്നു പുലര്‍ച്ചെ പടമല കുരുത്തോല സുനിയുടെ ആടിനെ കടുവ പിടിച്ചതോടെയാണ് തിരച്ചില്‍ ശക്തമാക്കിയത്. രാത്രി കാലങ്ങളില്‍ കടുവയിറങ്ങി വളര്‍ത്തുമൃഗങ്ങളെ കൊല്ലുന്നത് പതിവായതോടെയാണ് ഈ പ്രദേശത്ത് സുരക്ഷ ശക്തമാക്കിയത്. പയ്യമ്പള്ളി, കുറുക്കന്‍മൂല, ചെറൂര്‍ ഭാഗങ്ങളിലായി 5 കൂടുകളാണ് ഇതുവരെ സ്ഥാപിച്ചത്. വനത്തോടു ചേര്‍ന്നുള്ള ജനവാസ കേന്ദ്രങ്ങളില്‍ നിരീക്ഷണ ക്യാമറകളും ഒരുക്കി. കഴിഞ്ഞ 16 ദിവസത്തിനിടെ 14 വളര്‍ത്തുമൃഗങ്ങളെയാണ് കടുവ കൊന്നത്.