‘കണ്ടോടാ ഇത് കണ്ടോടാ….’ ലീഗ് തകര്‍ത്ത ഷെഡ് അതേ സ്ഥലത്ത് പുനഃസ്ഥാപിച്ച് സിപിഎം

മൂത്തേടം കുട്ടിക്കാട്ടില്‍ മുസ്ലീംലീഗ് പ്രവര്‍ത്തകര്‍ തകര്‍ത്ത വെയിറ്റിംഗ് ഷെഡ് അതേ സ്ഥലത്ത് തന്നെ പുനഃസ്ഥാപിച്ച് സിപിഐഎം പ്രവര്‍ത്തകര്‍. സ്ഥലത്തെ ലീഗ് പ്രവര്‍ത്തകരെ സാക്ഷി നിര്‍ത്തി കൊണ്ടാണ് സിപിഐഎം പ്രവര്‍ത്തകര്‍ ഷെഡും കൊടിമരവും സ്ഥാപിച്ചത്. സംഭവത്തിന്റെ വീഡിയോ പിവി അന്‍വര്‍ എംഎല്‍എയാണ് പുറത്തുവിട്ടത്. പിവി അന്‍വര്‍ പറഞ്ഞത്: ''ആദ്യത്തേ വീഡിയോ നിലമ്പൂര്‍ മൂത്തേടത്ത് ലീഗ് താലിബാനിസ്റ്റുകള്‍ സി.പി..എം നിര്‍മ്മിച്ച വെയ്റ്റിംഗ് ഷെഡ് തകര്‍ത്ത് കൊണ്ട് നടത്തിയ വെല്ലുവിളിയുടേതാണ്. ബി.ജെ.പിടേത് വച്ചാലും സി.പി.ഐ.എമ്മിന്റെ വെയിറ്റിംഗ് ഷെഡ് അവിടെ അനുവദിക്കില്ലാത്രേ. 'അവിടെ തന്നെ ലീഗ് വെയ്റ്റിംഗ് ഷെഡ് വയ്ക്കും. ഇജ്ജൊക്കെ കണ്ടോളീന്നും' എന്നും പറഞ്ഞിരുന്നു. ആര്‍ക്കും വേണം ലീഗിന്റെ അനുവാദം? അതേ സ്ഥലത്ത് തന്നെ സി.പിഎമ്മിന്റെ വെയ്റ്റിംഗ് ഷെഡ് സഖാക്കള്‍ പുന:സ്ഥാപിക്കുന്ന വീഡിയോ ആണ് രണ്ടാമത്തേത്. മലപ്പുറം ഒരുപാട് മാറി മക്കളേ..ലീഗിപ്പോള്‍ വെറും ലീഗാണ് ഞമ്മക്ക്.'' കഴിഞ്ഞദിവസമാണ് മൂത്തേടത്ത് സിപിഐഎം സ്ഥാപിച്ച ഷെഡ് മുസ്ലീംലീഗ് പ്രവര്‍ത്തകര്‍ തകര്‍ത്തത്. ലീഗ് താലിബാനിസം എന്ന ഹാഷ് ടാഗോടെ മൂത്തേടത്തെ ലീഗുകാര്‍ക്ക് സമനില തെറ്റിയെന്നാണ് അന്ന് സംഭവത്തെക്കുറിച്ച് അന്‍വര്‍ പറഞ്ഞത്. ലീഗ് പ്രവര്‍ത്തകര്‍ ഷെഡും സമീപത്തെ ബോര്‍ഡുകളും തകര്‍ക്കുന്നതിന്റെ വീഡിയോയും അന്‍വര്‍ പങ്കുവച്ചിരുന്നു. തുടര്‍ന്ന് പറഞ്ഞത് ഇങ്ങനെ: ''ജനങ്ങള്‍ക്ക് ഉപകാരപ്രദമായിരുന്ന ഒരു വെയിറ്റിംഗ് ഷെഡ് മൂത്തേടം കുട്ടിക്കാട്ടില്‍ സി.പി.ഐ.എം സ്ഥാപിച്ചു. ഇത് കണ്ടതോടെ മൂത്തേടത്തെ ലീഗുകാര്‍ക്ക് സമനില തെറ്റി. വെയ്റ്റിംഗ് ഷെഡും അടുത്ത് സ്ഥാപിച്ചിരുന്ന ഫ്‌ലക്‌സുകളും അവര്‍ തകര്‍ത്തു. നിങ്ങള്‍ക്ക് ഇതേ ചെയ്യാന്‍ കഴിയൂ. ജനങ്ങള്‍ ഇതൊക്കെ കാണുന്നുണ്ട്. ലീഗ്താലിബാനിസം.''