22കാരിയായി ചമഞ്ഞ് കോളജില്‍ ചേര്‍ന്നു, വിദ്യാഭ്യാസ വായ്പ തട്ടി,കാമുകന്‍മാരുമായി ഡേറ്റിങ്ങും -48കാരി അറസ്റ്റില്‍

ന്യൂയോര്‍ക്ക്: രണ്ടുവര്‍ഷത്തോളം 22കാരിയായ മകളായി ചമഞ്ഞ് തട്ടിപ്പ് നടത്തിയ 48കാരി അറസ്റ്റില്‍. 22കാരിയായ സ്വന്തം മകളുടെ പേരില്‍ കോളജില്‍ ചേരുകയും വിദ്യാഭ്യാസ വായ്പയും ഡ്രൈവിങ് ലൈസന്‍സും തരപ്പെടുത്തുകയും യുവാവുമായി പ്രണയത്തിലാകുകയും ചെയ്തിരുന്നു 48കാരി. മകളുടെ പേര് ഉപയോഗിച്ച് തട്ടിപ്പ് നടത്തിയതായി ലോറ ഓഗ്ലെസ്ബി കുറ്റസമ്മതം നടത്തി. 2016ല്‍ മകള്‍ ലോറന്‍ ആഷ്‌ലീ ഹെയ്‌സിന്റെ പേരില്‍ ഒരു സോഷ്യല്‍ സെക്യൂരിറ്റി കാര്‍ഡിന് അവര്‍ അപേക്ഷിച്ചിരുന്നു. മിസോറി ഡ്രൈവിങ് ലൈസന്‍സും അവര്‍ നേടിയിരുന്നു. 2017ല്‍ സൗത്ത് വെസ്റ്റ് ബാപ്റ്റിസ്റ്റ് യൂണിവേഴ്‌സിറ്റിയില്‍ മകളുടെ ഐഡന്റിറ്റി ഉപയോഗിച്ച് എന്റോള്‍ ചെയ്യുകയും ചെയ്തു. തുടര്‍ന്ന് വിദ്യാഭ്യാസ വായ്പക്ക് അപേക്ഷിച്ചു. ഫെഡല്‍ വിദ്യാഭ്യാസ വായ്പയായി 7.12 ലക്ഷം, പെല്‍ ഗ്രാന്‍്‌സായി 4.48 ലക്ഷം, യൂണിവേഴ്‌സിറ്റി ബുക്ക് സ്‌റ്റോറില്‍നിന്ന് പുസ്തകങ്ങള്‍ വാങ്ങാനായി 25,500 രൂപയും മറ്റു സാമ്പത്തിക ചെലവുകള്‍ക്ക് 1.41 ലക്ഷവും അവര്‍ തട്ടിയെടുത്തു. മിസോറിലേക്ക് പോകുന്നതിന് മുമ്പ് മകള്‍ക്കൊപ്പം അര്‍ക്കന്‍സസിലായിരുന്നു ലോറയുടെ താമസം. പിന്നീട് മകളുമായി ലോറ ബന്ധം പുലര്‍ത്തിയിരുന്നില്ല. ലോറ 22കാരിയാണെന്നാണ് മൗണ്ടന്‍ വ്യൂ വാസികളും വിശ്വസിച്ചിരുന്നത്. ഇതേ തുടര്‍ന്ന് പ്രദേശത്തെ ഒരു ലൈബ്രറിയില്‍ ജോലിയും തരപ്പെടുത്തിയിരുന്നു. 'എല്ലാവരും അവര്‍ പറയുന്നത് വിശ്വസിച്ചു. അവള്‍ക്ക് 22 വയസാണെന്ന് വിശ്വസിച്ച കാമുകന്‍മാരും ഉണ്ടായിരുന്നു' -മൗണ്ടന്‍ വ്യൂ പൊലീസ് ചീഫ് ജാമീ പെര്‍കിന്‍സ് പറഞ്ഞു. തട്ടിപ്പിന് ശിക്ഷയായി യൂണിവേഴ്‌സിറ്റിക്കും മകള്‍ക്കും ലോറ നഷ്ടപരിഹാരം നല്‍കണം. കൂടാതെ അഞ്ചുവര്‍ഷത്തെ ജയില്‍ ശിക്ഷയും അനുഭവിക്കണം.