ജനറല്‍ കോച്ചില്ലാതെ രാത്രിവണ്ടികള്‍

രാത്രിതീവണ്ടികളില്‍ ഒന്നിലും ജനറല്‍ കോച്ചില്ല. മുഴുവന്‍ കോച്ചുകളും സിറ്റിങ് സീറ്റുള്ള അന്ത്യോദയ എക്‌സ്പ്രസ് പോലും സാധാരണ ടിക്കറ്റുകാരെ കയറ്റില്ല. മലബാര്‍, മാവേലി, മംഗളൂരു എക്‌സ്പ്രസിലടക്കം സീറ്റ് റിസര്‍വ് ചെയ്യണം. സ്ലീപ്പര്‍ ടിക്കറ്റ് വെയിറ്റിങ് ലിസ്റ്റില്‍പ്പെടുന്ന അടിയന്തര യാത്രക്കാര്‍ക്ക് മാറിക്കയറാന്‍ നിലവില്‍ ഒരുവണ്ടിയിലും ജനറല്‍ കോച്ചില്ല. ജനറല്‍ കോച്ച് പുനഃസ്ഥാപിക്കുന്നത് കേരളത്തില്‍ വൈകുകയാണ്. മംഗളൂരുവില്‍നിന്ന് തിരുവനന്തപുരത്തേക്കുള്ള രണ്ടു വണ്ടികളില്‍ സാധാരണ ടിക്കറ്റും സീസണും നല്‍കിത്തുടങ്ങിയത് ഏറ്റവും അവസാനമാണ്. നവംബര്‍ 25 മുതല്‍ പരശുവിനും ഏറനാടിനും ഒപ്പം മംഗളൂരു-കോയമ്പത്തൂര്‍ ഇന്റര്‍സിറ്റി, പാലരുവി, മധുര-പുനലൂര്‍ എക്‌സ്പ്രസ് എന്നിവയിലും ജനറല്‍ കോച്ച് വന്നു. നിലവില്‍ രാത്രി 11-ന് കണ്ണൂരിലെത്തുന്ന ആലപ്പുഴ-കണ്ണൂര്‍ എക്‌സിക്യൂട്ടീവ് മാത്രമാണ് സാധാരണ ടിക്കറ്റെടുത്ത് കയറാന്‍ പറ്റുന്ന ഒരു രാത്രിവണ്ടിയെന്ന് പറയാനുള്ളത്. ലോക്കോപൈലറ്റുമാരില്ല റേക്കുണ്ടായിട്ടും പാസഞ്ചര്‍ ഓടിക്കാന്‍ പാലക്കാട് ഡിവിഷനില്‍ ലോക്കോ പൈലറ്റുമാരില്ല. നിലവില്‍ 55 ലോക്കോ പൈലറ്റുമാരുടെ കുറവ് ഡിവിഷനിലുണ്ട്. ഒരാള്‍ ലീവാക്കിയാല്‍ സര്‍വീസ് മുടങ്ങുമെന്ന അവസ്ഥ. പാസഞ്ചര്‍ ഓടിക്കേണ്ട 57 ലോക്കോപൈലറ്റുമാരുടെയും മെയില്‍ വണ്ടികള്‍ ഓടിക്കുന്ന 11 പേരുടെയും ഒഴിവ് നികത്തിയിട്ടില്ല. രണ്ട് ഷണ്ടര്‍ ലോക്കൊപൈലറ്റിന്റെ ഒഴിവും ഡിവിഷനിലുണ്ട്. ലോക്കോ പൈലറ്റുമാരുടെ പ്രമോഷന്‍ നടക്കാത്തതാണ് ഈ പ്രശ്‌നത്തിന് കാരണമെന്ന് ലോക്കോപൈലറ്റ് അസോസിയേഷന്‍ പറയുന്നു. ചരക്കുവണ്ടി ഓടിക്കുന്ന ലോക്കോപൈലറ്റുമാര്‍ക്ക് പ്രമോഷന്‍ നല്‍കി പാസഞ്ചര്‍/മെയില്‍ വണ്ടി ഓടിക്കുന്നവരാക്കിയാല്‍ ഈ പ്രതിസന്ധി പരിഹരിക്കാം.